Polar Seafood 200 million koruuninik sinneqartoorpoq

Aalisarnermut suliffissuaq Polar Seafood aningaasaqarnermut missingersuutini saqqummiuppai. Akileraarutit suli ilanngaatiginagit suliffeqarfik namminersortoq 203 million koruuninik sinneqartoorpoq. Angusaq siulersuisunit naammagisimaarneqarpoq.

Aalisakkanik ikerinnarsortunik aalisarnermut pimoorussilluni aningaasaliinera kinguneqarluarpoq.

2,5 milliardit koruunit kaaviiaartinneqartut
- Aalisarneq tamanna suliffeqarfiutitsinnuinnaanngitsoq pingaaruteqarpoq, aammali imartartinni qanoq aalisagaqartigineranik, soorlu qanoq avaleraasartooqartigineranik, Nunatta uppernarsaasersuinissaanut pingaaruteqarluni. Matumani koruuninik milliardip affaanik imaluunniit milliardinik aalisarneq naleqarluni, taamaattumik eqqortumik ineriartortitsinissaq pingaaruteqarluinnarpoq, Polar Seafoodip siulersuisuini siulittaasoq Henrik Leth tusagassiutinut nalunaarummi oqarpoq.

Polar Seafoodimi ukiumi 2013-mi aningaasat 2,5 milliard koruunit kaaviaartinneqarput. Akileraarutit suli ilanngaatiginagit 203 million koruuninik sinneqartoorneq pingaaruteqartoq siulersuisuni siulittaasup oqaatigaa.

- Nunat tamalaat akornanni unammillersinnaalernissaq angussagaanni aningaasaliinissat pisariaqartinneqarluinnarmata. Taamaattumik imminut akilersinnaasumik ingerlatsinissaq angussagaanni inuussutissarsiutip taassuma ingerlatsinermut piginnaaneqassusia ukkatarineqartuartariaqarpoq. Tamanna Polar Seafood-imi angusinnaasimavarput eqaatsumik ingerlatsinitsigut suliffeqarfiullu pissutsinut naleqqussartuarneratigut, tassami niuerfinni akit appartarnerinut qaffattarnerinullu allanngorartunut naleqqussapallassinnaaneq pisariaqarpoq, Henrik Leth oqarpoq. Oqaatigaalu 2013-mi angusat 2014-misut isikkoqarnavianngitsut.

Inuiaqatigiinnut aningaasaliineq
Suliffeqarfissuup immikkoortortallip Polar Seafood-ip inuiaqatigiinnut toqqaannartumik tunniussai 2013-imi 215 million koruunit missaanniipput, taakku akileraarutinut A-nut, suliffeqarnermut akitsuutinut, raajanut qaleralinnullu akitsuutinut, nakkutilliinermut akitsuutinut kiisalu ingerlatseqatigiiffinnit iluanaarutisianiillu akileraarutinut aggutaarsimapput.

- Nunatta avataani suliatta nunani tamalaani inissisimanerput nukittorsarpaat, taamaalillunilu isertitaqarnissamut tunngaviliillutik, siulersuisuni siulittaasoq Henrik Leth erseqqissaavoq.