Polar Nanup naalagaa killisiorneqartoq
Polar Nanumi naalagaasup killisiorneqarnermi, Birna Brjánsdóttirimut toqutsisimasutut unnerluutigineqartoq pitsaasuinnarmik oqaaseqarfigaa.
Birna Brjánsdóttirip toqutaasimasutut ilimagineqartup aqaguani toqutsisimasutut unnerluutigineqartoq takusimallugu, kilisaatip naalagaata nassuiaatigaa. Naalagaasup toqutsisimasutut unnerluutigineqartoq biili attartortagaq aappaluttoq Kia Riomik mærkilimmik, Hafnarfjörðurip umiarsualiviata killiganut ingerlaartoq takusimavaa, toqutsisimasutulli unnerluutigineqartoq minutsit tallimat qulillu akornanni tassaniissimalluni.
Biili utertikkaa
Toqutsisimasutut unnerluutigineqartoq kilisaatip naalagaata aallartussanngorneq pissutigalugu biili utertittariaqaraa paasitissimavaa, islandimiut nittartakkatigut nutaarsiassaqartitsiviani mbl.is-mi eqqartuussinerni tusagassiisartoq allappoq.
Birnallu periarfeerunneqarnera tamani ilisimaneqalernerata kingorna, toqutsisimasutut unnerluutigineqartoq qanoq attaveqatigiinnersut, kilisaatip naalagaa aperineqarpoq.
Biilimi arnat marluk
Kilisaatip naalagaa aallavigalugu, 'biilimi arnat marluk ilaasimasut, taakkuli Krónamut (pisiniarfissuaq, aaqq.) apuutiinnarsimallugit' toqutsisimasutut unnerluutigineqartup oqaluttuarisimavaa.
Biilimilu arnat marlusimanersut ataasiinnaasimanersorluunniit apeqqut, toqutsisimasutulli unnerluutigineqartup nassuiaatai allanngorarsimasut inuttat killiorneqarnerminni nassuiaatigaat. Piffissap ilaani arnaq ataaseq eqqaaneqartarpoq, piffissallu ilaani arnat marluk eqqaaneqartarlutik, mbl.is allappoq.
Toqutsisimasutut unnerluutigineqartup kilisaatip naalagaanut sms-iani takutissimavaa, tassani taassuma arnaataa aperisimalluni: "Ujaarineqarunarputit".
Arlaannik ajortuliorsimanngikkuni ernumassutissaqanngitsoq, kilisaatip naalagaata toqutsisimasutut unnerluutigineqartoq nassuiaassimavaa. Toqutsisimasutulli unnerluutigineqartoq ajortuliorsimannginnerarpoq.
Sianerfigineqaqattaartut
Kilisaammi inuttaasut nutaarsiassaqartitsivinnit oqaloqatigineqarusullutik sianerfigineqaqattaarsimasut, kilisaatip naalagaata oqaluttuaraa.
Aamma atuaruk: Toqutsisutut unnerluutigineqartoq Polar Nanormut uterami annilaangarpasippoq