Polar Nanumi inuttat marluk tigusarineqarput
Kilisaatip Nunatsinneersup inuttai marluk Islandip politiivisa tigusarigaat nutaarsiassaqartitsivik RUV allaaserisaqarpoq
Islandimi nutaarsiassaqartitsiviup RUV-p paasissutissaatai aallaavigalugit islandimi politiit Polar Nanumi inuttat marluk tigusaraat.
Islandermiu 20-nik ukiulik Birnu Brjánsdótturs arfininngormat ullaakkut periarfeerunneqartumut paasissutissaateqarnerinik tigusarineqartut pasineqarput.
Islandimi politiit immikkut sungiusakkat qulimiguulimmut ilaallutik kilisaat islandimut ingerlaartoq orneriariarlugu inuttat marluk tigusaraat.
Politiillu immikkut sungiusakkat kilisaammut apuukkamik kilisaatup aquttua aquummik arsaarpaat Islandimullu ingerlaarneq politiinit ingerlanneqarlersimasoq nutaarsiassaqartitsiviup RUV-p allaaseraa. Kilisaammi innuttanit akiuunnertaqanngitsumik tamanna pisimavoq.
Tigusarineqartullu islandimut apuuteriarpata killisiorneqartussanngorlutik.
Atuaruk: Inuttat unnerluutigineqanngillat
Periarfeerunneqartoq 20-nik ukiulik Birnu Brjánsdótturs Reykjavikkimi arfininngormat ullaakkut arfernup qeqqata arfernullu missaani sumiissimaneranik politiit misissuiffigaat. Filmiliutillu nakkutiginnissutit ikiortigalugit arnaq Reykjavíkip qeqqatigut kisimiilluni ingerlasoq politiit paasivaat. Ingerlatillunilu angut marluk naapissimavai, taakkulu politiinit maanna apersorneqartussanngorlutik.
Politiit attaveqaatileriffik ikiortigalugu Birna Brjánsdóttir mobiliatigut sumiissimanera misissuiffigigamikku talittarfiup tungaanut ingerlaarsimasoq paasivaat. Nalunaaqutarlu arfininngunngitsiartoq mobilia qamissimalluni.
Misissuinermut atatillugu biilit attartortakkat Kia Rio misissuiffigineqalersimallutik.
Periarfeerunneqartup ingerlaffiani biilit takuneqarsimapput, kingunitsianngualu talittarfimmukarsimallutik. Biililli ataatsit pineqarnersut qulakkeerneqarsinnaasimanngilaq, filmiliuutikkut nummerpladii takuneqarsinnaasimanngimmata.
Biilit pineqartut Polar Nanumi inuttanit attartorneqarsimasut nalunaarsorneqarsimavoq, tamannalu paasineqarmat politiit kilisaat arfininngormat ullaakkut Islandimit aallartoq eqqumaffigilersimavaat.
Polar Nanup piginnittuisa, tassa Polar Seafood, attaveqarfigereernerisigut kilisaat Islandimut utissasoq peqquneqarpoq. Nalunaaqutarlu unnukkut aqqaninngulernerani apuunnissaa naatsorsuutigineqarluni.
Islandimi politiit suliaq pimoorussimammassuk kilisaammukariarlutik inuttat aquummik arsaarsimavaat.