Polar Fish aatsaat taama ornigarneqartigisoq
Sapaatip-akunnerata naanerani inuit 1800-nit amerlanerusut Sisimiuni saqqummersitsineq Polar Fish ornippaat. Taamaalilluni pingasunik tulleriiginnarnik saqqummerstisinermi orniguttut amerlassusaat pallinneqarlutik
Polar Fishimi saqqummersitsinerni 2016 ornigarneqarnerpaasimagaluarpoq. 2014-imi aamma taamaassimavoq, kisianni Polar Fish 2018 maanna nalunaaruteqarsinnaalerpoq, Sisimiuni aalisarnermut tunngasunik saqqummersitsisoqarmat tallimanngornerup, arfininngornerup aamma sapaatip ingerlanerani 1814-nik ornigarneqarami siuttunngorpoq.
Saqqummersitsisut ulluni pingasuni ulapereerlutik naammagisimaarluarlutik sapaatiummat poortuipput, tassani aallaqqaataaniilli naanissaata tungaanut orniguttoqarluarpoq. Tallimanngornermi saqqummersitsisut ilaasa nalunaarutigaat saqqummersitsinermi anguniagaq anguneqareersoq, taamaattumillu ullut sinnerini iluanaaruteqarlutik. Saqqummersitsisut arlallit aamma tulliani Polar Fisheqarnissaannut inissamik inniminneereersimapput.
- Sisimiuni saqqummersitsilluareerluta angerlaluta oqaatigisariaqarparput, tamatuma saniatigut arlallit Polar Fish 2020-imut inissamik annerusumik noqqaassuteqarput, taamaammat iluatsilluartutut oqaatigisinnaavarput. Uani ammasarfiit aamma akunnermik ataatsimik sivitsorpagut, piffissallu ingerlanera tamaat inoqaannavinneranik kinguneqarpoq, Else Herfort oqarpoq, Aalborg Kongres & Kultur Centerimi saqqummersitsinermut pisortaq, aamma Sisimiuni Polar Fishimik ukioq allortarlugu aaqqissuisuuvoq.
Saqqummersitsinermut orniguttut Sisimiuni aalisartuupput, kiisalu aamma illoqarfinnit allanit Nuummiit, Ilulissaniit aamma Maniitsumiit orniguttoqarluni.