Narsaq
Pokali ingerlaartoq tammartoq
Narsami ukioq manna timersullammanngortoq pokalini tigunngikkallartariaqassavaa
Pavia Peter Fontain sapaatiummat Narsami timersullammattut nersornaaserneqarpoq.
Kisianni pisarnertut pokali ingerlaartinneqartartoq nersornaaserneqarnerminut atatillugu tigunissaa utaqqigallartariaqassavaa. Pokalerlu nutaaq piniarneqarsimasoq suli tikissimanngimmat.
Annertuumik sunniuteqartoq
Tamassumali Pavia Peter Fontainip annertuumik iliuuseqarnermigut nersornaaserneqarnera allanngortinngilaa. Taanna timersortartutut timersoqatigisartakkani sungiusarnernut takkuttuarnissaannik kajumissaarisarpoq, aammalu inuillu amerlasuut N-85 assammik arsartartuinik siuarsaasut akornaniippoq. Kiisalu isikkammik aamma assammik arsartartuuvoq, tunngavilersuutit taama oqaasertaqarput.
Peter Enoksen illoqarfiup Taekwon-dortartuinut annertuumik iliuuseqarnerminut sungiusaasuullammattut toqqarneqarpoq.
Piukkunnaatillit
Piukkunnaatilinnut nersornaat N-85-ip arsartartuinut U-14-nut tunniunneqarpoq, tiimerpassuit atorlugit sungiusarsimallutik futsalimi GM-ernerminni angusaqaramik.
Uku arsartuupput Børge Karlsen, Avataq Motzfeldt, Maligiaq Frederiksen, Johannes Thomassen, Aqqa Lynge, Tina Petersen, Augusta Aronsen, Marie Kielsen kiisalu sungiusaasoq Georg Poulsen.
Kajumissaat
Narsami inuit pinnguaataannik timmersoqatigiinnik aallartitsinerminnut, Arctic Sport Narsaq, kajumissaammik nersornaaserneqarpoq, aamma ukioq manna GM-imi angusaminnut atatillugu. Mona Fomtain nersornaammik tigusisuuvoq, Arctic Sport Narsamik pilersitsisoq aqutsisorlu, Heidi Kielsen angalanera pissutigalugu.
Aappariit Adolfine aamma Sebulon Poulsen ukiut 50-it sinnerlugit Kujataani peqatigiiffilerinermik suliaqarnerminnut atatillugu ataqqinaammik nersornaaserneqarput.
Alakkarneqarluartoq
Nersornaasiinernut atatillugu illoqarfiup innuttaasui amerlasuut Narsap Timersortarfianut alakkarteripput, tassani kommuni kaffillerlunilu kaagillerpoq.
Erinarsoqatigiit erinarsorlutik aliikkusersuipput, aamma Oleeraq Nielsen nipilersornermik ilinniartitanilu guitarerlutik tusarnaartitsipput. Benjamin Kielsen aamma Jens Thorin juullerpaluttunik atuillutik tusarnaartitsipput.
Utoqqaat timersortartut peqatigiiffiat Arpaligaat eqaarsaarnermik takutitsipput, naggataagullu Narsami Kalattoortartut Peqatigiiffiat kalattoorlutik takutitsipput.
Assit takukkit: Ukiumi timersullammaat Narsami toqqarneqarput