PN: Sooruna nioqqutissat taama akisutigisut?

Brugsenimi, Pisiffimmi imaluunniit Pilersuisumi pisiniaraanni akiliutissat amerliartupiloortarput. Nunarsuaq tamakkerlugu Kalaallit Nunaanni akit qaffasinnerpaamiipput.

Tamanna ajorpoq, Per Rosing-Petersen (PN) taama isumaqarpoq.

- Nunatsinni nioqqutissat akii akuersaarneqarsinnaanngitsumik qaffasippallaarujussualernikuupput, ilaqutariinnullu aningaasaqarnikkut ilungersunareeqisumi suli artukkiinerulersitsiinnarnikuullutik, tamannalu naapertuutinngilaq, taanna siunnersuummini taama allappoq.

Per Rosing-Petersenip (PN) akit taama qaffasitsiginerinut Naalakkersuisut misissuinissaat piumasaraat.

Naleqqameersup tamanna nammineq misissuiffigaa, nioqqutissallu Danmarkimit eqqussorneqartarnerat akisunerinut pissutaanerpaasoq taanna isumaqarpoq.

Nioqqutissaq Bulgariami 48 koruuninik akeqartoq Danmarkimi 138 koruuninik akeqarpoq. Norge, Island aamma Schweiz kisimik akisunerupput.

Taamaammat nioqqutissat nunanit allanit eqqussorneqartartuuppata akikinnerussagaluartutm Per Per Rosing-Petersen (PN) isumaqarpoq.

- Nunatta niueqateqarnerata akikinninngorujussuarlugu allanngortinneratigut, akissarsiat/utoqqalinersiutit/ilinniarnersiutit qaffanngikkaluarlugit pisiniutigisinnaaneri 30-40%- imik qaffassinnaangaluarpagut, tassuunalu aamma atugarissaarnerulerneq aqqutissiuullugu.

Nassiussinermi akit naatsorsuusiani ajoqutaanavianngitsut isumaqarpoq.

Inuussutissarsiornermut, suliffeqarnermut niuernermullu naalakkersuisup, Hans Enoksenip (PN), Nunatsinni nioqqutissat Danmarkimit 6 procentimik qaffasinnerusut akissuteqaammini ilumoornerarpaa.

Taamaammat akit qaffasinnerinut pissutaasut misissorneqarnissaannut siunnersuut tapersersorpaa.