Inatsisartut
PN: Meeqqat angerlarsimaffiup avataanut inissinneqarsimasut angerlaqqittassapput
Meeqqanut atugarliortunut angajoqqaajusut akisussaaffimmik tigusinerussapput,
Meeqqat atugarliortut Inatsisartuni ullumikkut qitiussapput. Anthon Frederiksen (PN) marlunnik apeqquteqaateqarluni oqallinnissamut siunnersuuteqarpoq, taakku angajoqqaat akisussaaffimmik annerusumik tigusinissaannik isumqarneranik aallaaveqarput.
Atuaruk: Meeqqanut atugarliortunut Nuummi katsorsaavik
Meeqqat angerlarsimaffiup avataanut inissinneqartut utertassapput
Meeqqat angerlarsimaffiup avataanut inissinneqartut angajoqqaaminnut uteqqittarnissaannik toraagaqartumik suliniuteqartoqassasoq, Anthon Frederiksen (PN) isumaqarpoq.
Meeqqat angerlarsimaffiup avataanut inissinneqarsimasut september 2014 tikillugu 642-inik amerlassuseqartut taassuma tikkuarpaa, tamatumunngalu pisortat akiligassaat ukiumut 235 millionit koruunit tikikkaat tikkuarpaa.
- Meeqqat nuannaanngitsut amerlavallaaqaat, tamannalu akuersaarneqarsinnaanngilaq, Anthon Frederiksen siunnersuummini allappoq.
Atuaruk: Meeqqat pillugit inatsisip meeqqat pisinnaatitaaffii qulakkiissavai
Nakkutiginninneq annertunerusoq
Meeqqanut angerlarsimaffiup avataanut inissinneqarsimasunut angajoqqaat nakkutigineqarnerulissasut, kiisalu siunnersorneqarnissamik katsorsarneqarnissamillu neqeroorfigineqarnissaat siunnersuutigaa. Tamanna angajoqqaat suleqatigalugit pissasoq, taanna isumaqarpoq.
- Taamaammat angajoqqaat ilaasa meeqqat pisariaqartitaat pisortanut ingerlateqqiinnartarnera akuersaaginnarneqassanngilaq, Anthon Frederiksen allappoq.
Atuaruk: Meeqqanut inuusuttunullu atugarliortunut sullissineq nukittorsaraat
Angerlarsimaffiit avataanut inissiisarnerit pinaveersaaartinniaraat
Ataatsimiinnermi inatsimmik meeqqanut iluaqutaasussamik saqqummiussisoqarniartoq, ilaqutariinnermut isumaginninnermullun naalakkersuisoq Martha Lund Olsen (S) akivoq. Meeqqat pisinnaatitaaffii aamma kommunit amerlanerusunik iliuuseqarnissamut periarfissinneqarnissaat taassuma nukittorsassavaa.
Martha Lund Olsenip (S) pinaveersaartitsinermut annerpaartaa inissinneqarnissaa pingaartippaa, taamaaliilluni pinngitsaaliissummik inissiinissaq pisariaqavitsillugu pisussanngorlugu.
Atuaruk: Isumaginnittoqarfik tukattoq paasisat nutaat uppernarsarpaat
Nammineq angerlarsimaffimmi ikiorneqarneq
Meeqqat angerlarsimaffimminni sapinngisamik periarfissaatillugu ikiorserneqartarnissaat suliniutit arlaqartut qulakkiissavaat. Ilaatigut meeraq suli inunngunngitsoq kommunit angajoqqaanut ikiorsiinissamik neqerooruteqarsinnaanngortinneqassapput.
Tamanna ilaqutariinnut sullisivinniinnermi, katsorsarneqarnissamik neqeroorfigineqarnermik imaluunniit angajoqqaanut ilaqutariinnut pikkorissarnikkut tamanna pisinnaassaaq.
- Ilaqutariinnut meerartalinnut ajornartorsiortunut ikiorsiinissaq ujartuisuullunilu siusinaartumik pinaveersaartitsinissaq siunertaralugu pinissaa inatsisissatut siunnersuutip pingaartippaa, Martha Lund Olsen allappoq, taassuma aamma angajoqqaat piumasaqarfigineqarnissaat pingaartippaa.
Atuaruk: Meeqqanut atugarliortunut ikiuineq
Qasuersimallutik atuariartortarnissaat
- Inatsisissamut siunnersuummut ilaavortaaq kommunit inatsisitigut toqqammavissinnissaat angajoqqaanik peqqusisarnissamut, soorlu assersuutigalugu angajoqqaat qitornaminnik kaannatik qasuersimallutillu atuariartortitsisarnissaannik peqqusisinnaanissaat, Martha Lund Olsen allappoq.
Kommunit aamma angajoqqaat akisussaaffii pillugit oqaloqatigiinnissamut aggersaanissamik periarfissinneqassapput.