siunnersuut

PN: Air Greenland tamakkiisumik pigineqalerli - imaluunniit tuniniarli

Namminersorlutik Oqartussat Air Greenlandip 37,5 procentimik piginneqataassutai pillugit apeqquteqaateqarluni oqallissaaruteqarpoq

Namminersorlutik Oqartussat Air Greenland tamakkiisumik pigilissappagu, Nunatsinnut akilersinnaanerunersoq, Partii Naleqqap paaserusuppaa.

Maanna Namminersorlutik Oqartussat 37,5 procentit pigivaat, SAS-ip aamma taamatut 37,5 procentit pigivai, kingulliillu 25 procentit danskit naalagaaffiata pigisarai.

Nunatsinni kaaviaartitat amerlanerit
Tassani Namminersorlutik Oqartussat SAS aamma danskit naalagaaffiata piginneqataassutai pisiarissavai. Nunatsinnut aningaasatigut iluaqutaanissaa tassani takorluugaavoq.

- Partii Naleqqamiit assut pingaartipparput, aningaasat sapinngisami nunatsinni amerlanerpaat kaaviiaartinneqarnissaat, Anthon Frederiksen (PN) oqallissaarutiminut tunngavilersuivoq.

Tamatumali saniatigut taassuma misissortinniarpaa, illuanik piginneqataassutsit danskit naalagaaffiannut aamma SAS-mut tunigaanni akilersinnaanerunersoq.

Akilersinnaanngitsoq
Kalaallit Nunaata taakku arlaat iliuuseqarfigissanngilai. Naalakkersuisut siulittaasuata Kim Kielsenip (S) akissuteqaataani tamanna pingaarnertut oqaatigineqarpoq. Tassami taakku arlaannaalluunniit akilersinnaanngilaq.

- Naalakkersuisut Namminersorlutik Oqartussat aktiaatilinnit allanit aktianik pisissappata inuiaqatigiit aningaasaqarnerannut tunngatillugu taamaaliorneq iluaqutaassangatinngilaat, Kim Kielsen (S) tunngavilersuivoq.

- Oqaatigineqarsinnaavoq taamatuttaaq Naalakkersuisut Air Greenlandimut piginneqataassutitik tuniniarlugit pilersaaruteqanngimmata kisiannili Air Greenlandimik piginneqataanertik atorniarlugu ingerlatseqatigiiffiup pitsaasumik suliffeqarfimmik ingerlatsisoqarnera tunngavigalugu inuiaqatigiinnut iluaqutaanerata nuannaarutaaneratalu qulakkeerneqarnissaannut, akissuteqaammi tamanna allaqqavoq.

Piginneqataassutsini allannguisoqarsinnaasoq
Piginneqataassutsilli annertussusaat nikisinneqarsinnaaneri, Naalakkersuisut siulittaasuata oqaatigaa. Tamannali piginneqataasut marluk piserusuppata tuniserusuppataluunniit aatsaat pissaaq.

Apeqquteqaat aallaavigalugu oqallinnissamik siunnersuut aqagu marlunngornermi oqallisigineqassaaq.

Powered by Labrador CMS