Inatsisartut

Plastikkimik atuineq Inatsisartuni oqallisigineqalersoq

Peqqinnissarput pillugu, pinngortitallu asattuunnissaa peqqutigalugu plastikkinik atuinittaannikilliartornissaa politikkikkut anguniartariaqarparput, Mimi Karlsen (IA) oqarpoq.

Apeqquteqaat aallaavigalugu oqallisissiatut siunnersuut puussiat plastikkit eqqaavinnut atorunnaarsikkiartorneqarnissaannut aallartitsinissamut tunngasoq, ullumi sisamanngornermi Inatsisartuni oqallisigineqassaaq.

Inatsisartunut ilaasortaq Mimi Karlsen (IA) apeqquteqaat aallaavigalugu oqallisissamut siunnersuuteqartuuvoq, puussianillu assigiinngitsunik atuinerup annertusiartuinnarnera ugguaraa.

- Eqqakkat nalinginnaasut igaffitsinni puussianut poorlugit silatitsinni puussiarsuarnut igittarpagut. Taakkorpassuit allallu puussiat ikuallanneqartarput, peqqinnanngeqisumillu pujuliortarlutik, taanna siunnersuummini allappoq.

Aaqqiissutissanik nassaartoqarli
- Suli pitsaannginnersaavoq puussiat plastikkit pinngortitamut eqqaannarneqaraangata. Arrortikkuminaatsuugamik sivisoorsuarmik nungujartortarput, pinngortitamut uumasunullu ajoqutaaqalutik. Imartatsinnut eqqaaneq ajoqutaasaqaaq motorinullu aserorsaataasarluni, Mimi Karlsen erseqqissaavoq.

Taamaattumik puussianik plastikkinik atuinerup atorunnaarsikkiartorneqarnissaanik isumaqarpoq.

- Nunaavugut immamik, imermillu amigaateqanngitsoq, taamaammallu eqqaaviit spandit pisariunerugaluartut atortariaqarsinnaavagut. Pisianut puut allat atornissaannut pikkorinnerusariaqarpugut. Nunarput pinngortitarsuarlu eriagitigu ataatsimoorlutalu aaqqiinissamik piumassuseqarluta oqallisigalugu, Mimi Karlsen oqarpoq.

Oqallinneq ullumi sisamanngornermi pissaaq.

Powered by Labrador CMS