Greenland Contractors
Pituffimmik sullissinermik isumaqatigiissutip sivitsorneqannginnera IA-p ernumanartoqartippaa
Pituffimmik sullissinermik isumaqatigiissut Greenland Contractorsip annaavaa. - Taamatut pisoqarnera inuiaqatigiinnut kalaallinut ajorluinnarpoq, IA-mit oqaatigineqarpoq Naalakkersuisunullu apeqquteqaateqarlutik
Thule Air Basep 2022-mi septembarip 30-annut ingerlanneqarneranut aserfallatsaalineqarneranullu isumaqatigiissut 411 millioner dollarinik (2,4 milliarder koruunit missaannik) aningaasartalik qallunaat selskabiannit amerikarmiunit pigineqartumit Vectrus-imit ajugaaffigineqarpoq.
Taamaasilluni Greenland Contractors septembarip 30-ani 2015-mi oqaluttuaannanngussaaq.
Greenland Conctractorsip 2/3-lia entreprenøritut ingerlatsivimmit MT Højgaardimit pigineqarpoq, sinneralu 1/3-lia namminersorlutik oqartussanit pigineqartumit Greenland Holdingimit pigineqarluni.
Kingunissai ernumagineqarput
Greenland Contractorsip Pituffimmi sullissinissamik isumaqatigiissutaata sivitsorneqannginnera Inuit Ataqatigiinnit ernumanartutut isigineqarpoq.
Ingerlatsivimmut Greenland Holding-imut pisortanit pigineqartumut, nunatsinni inuutissarsiutinik siuarsaaneq iluanaarutinit isumaqatigiissummit tassannga pissarsiarineqartartunit aamma aningaasaleeqataaffigineqartarmat Inuit Ataqatigiinnit Sara Olsvigimit Naaja Nathanielsenimiillu oqaatigineqarpoq.
- Kiisalu amerlasuunik lærlingeqartoqartarlunilu sungiusaammik suliffissaqartitsisoqartarnera pillugu ilinniartoqarfitsinnut, Sara Olsvig aamma Naaja Nathanielsen tusagassiutinut nalunaarummi allapput.
Naalakkersuisunut apeqquteqartut
Greenland Contractorsip sullissinissamut isumaqatigiissutaata sivitsorneqannginnera inuiaqatigiinnut qanoq kinguneqassanersoq pillugu Sara Olsvig aamma Naaja Nathanielsen Naalakkersuisunut apeqquteqarput:
- Isumaqatigiissutip danskit/kalaallit suliffeqarfiutaannit tigummiinnarneqarnissaa anguniarlugu Naalakkersuisut suliniuteqarsimanersut aammalu inuiaqatigiit kalaallit suliassanik isertitassanillu pissarsiaqartuinnarnissaat anguniarlugupiumasaqaateqartoqarsimanersoq?
- Suliaq Permanent Committee-mi oqaloqatigiittarfimmiluunniit allami Naalakkersuisut qaqillugulu malersorsimavaat?
- Isumaqatigiissummik tunniussinermut atatillugu piumasaqaatigineqartut tamakkerlugit naammassineqarsimappat?
Inuit Ataqatigiinni politikkerit apeqquteqarput. Imaassinnaasorooq suliffeqarfik isumaqatigiissummik pissarsisoq danskit-amerikarmiut illersornissamut isumaqatigiissutaanni naammasseqqusaasunut naammassinninngissimasoq, tamannalu pillugu ima aamma akissuteqartoqarnissaa kissaatigaat:
- Isumaqatigiissutit atuuttut malittuinnarneqarnissaat akileraarutitigullu isertitat siunissami taakkuujuarnissaat qularnaarneqarsimasut oqarsinnaavugut?
- Lærlingit suliffissaasa taama amerlatigittuinnarnissaat aamma qularnaarneqarsimasoq oqarsinnaavugut? Tamakku qulakkeerneqarsimanngippata Nunatta Karsianut inuiaqatigiinnullu annaasat angisoorujussuussapput, Sara Olsvig aamma Naaja Nathanielsen oqarput nangillutillu:
- Pisortatigoortumik piaarnerpaamik nalunaaruteqartoqassasoq naatsorsuutigivarput. Apeqquterpassuit akineqanngitsut inunnik ataasiakkaanik, suliffeqarfinnik kikkunnillu tamanik Nunatta Karsiata siunissaanik ernummateqartunik toqqissisimannginnermik misigititsipput.