Greenland Contractors

Pituffimmi sulisartut suliffitik ernumagivaat

Pituffimmi sulisartut suliffimmik annaanissaat ernumagaat Greenland Contractorsip kiffartuussinissamut isumaqatigiissut annaareeraalu. Pituffimmi sulisartut politikerinut arlalinnik uani apeqquteqaateqarput

Thule Air Base, luftfoto, lufthavnsområdet, landingsbane
Pituffimmi sulisartut politikerinut arlalinnik apeqquteqarput

Suliffeqarfik amerikamiunit pigineqartoq, Danmarkimili angerlarsimaffilik Exelis Services, Pituffiup 30. september 2015-imiit 30. september 2022-mut ingerlanneqarneranut aserfallatsaalineqarneranullu isumaqatigiissut 411 millioner dollarinik (2,4 milliarder koruunit missaannik) aningaasartalik tiguaa.

Taamalu pisoqarnera Pituffimmi sulisartunut ernumalersitsivoq. Taakkua Sermitsiaq.AG-mut attaveqarput.

Pituffimmi sulisartut kinaassusertik tusagassiuutitigut saqqummiukkusunngilaat, taamaammallu Sermitsiaq.AG-ip uani atii saqqummiunnagit apeqqutaat saqqummiuappai.

Sulisartut kinaassutsiminnik isertuussisut tusarsimavaat Exelis Services A/S-ip neqeroorutaa naleqarsimasoq 2.020.000.000 danskit koruuninik, imaluunniit maanna isumaqatigiissutaasup nalingata pingasorarterutaanik.

Atuaruk: Pituffimmik sullissinermik isumaqatigiissutip sivitsorneqannginnera IA-p ernumanartoqartippaa

Suliffiit affaannanngortinnissaat ernumagaat
Pituffimmi sulisartut ilanngullugu allapput neqeroorutip takutikkaa Exelis Services A/S-ip kiffartuussinissamut isumaqatigiissut 200-nnarnik sulisoqarluni ingerlakkusukkaa imaluunniit sulisarutnut isumaqatigiiissutaareersut atorunnaarsinniarpasikkaat.

Pituffimmi sulisartut kinaassutsiminnik isertuussisut oqarnerat naapertorlugu, taava Pituffimmi qatserisartoqarneq peqqissaaveqarnerlu sulisunik 50-nik pisariaqartitsivoq. Taamaammat Pituffimmi sulisartut isumaqarput piviusorsiornerunngitsoq kiffartuussinissamut isumaqatigiissutip sulisunit sinneruttunit, tassa 150-init, naammassineqarsinnaanera.

Atuaruk: Thulemi sakkutooqarfiup ingerlannera Vectrus-ip tiguvaa

Pituffimmi sulisartut ukua akissutissarserusuppaat
Taamaammat Pituffimmi sulisartut kinaassutsiminnik isertuussisut ukua apeqqutit politikerinut akisussaasunut apeqqutigaat:

1. Qanoq ililluni akuersaarneqarsinnaava USAF-ip isumaqatigiissut amerikamiunit 100 procentimik pigineqartumut tunniunneqarnera?

2. Qanoq ililluni akuerineqarsinnaavaa USAF-ip isumaqatigiissut tunniukkaa suliffeqarfimmut siulersuisoqarnermigut pisortaqarnermigullu amerikkamit ingerlanneqartumut?

3. Qanoq ililluni akuerineqarsinnaava isumaqatigiissut suliffeqarfimmut Danmarkimi inatsisilerituup postboksianut taamaallat adresseqartumut USAF-imit tunniunneqarnera?

4. Qanoq ililluni akuerineqarsinnaava USAF-ip isumaqatigiissummik tunniussinera suliffeqarfimmut maanna sulisut pillugit isumaqatigiissutaasut malillugit ingerlatserusuppasinngitsumut?

5. Qanoq ililluni inuiaqatigiinnit kalaallinit akuerineqarsinnaava nunatsinni ilinniartoqartarfiit annersaat ilinniartoqarnissaminut maanna nukissaarutilernera?

Ilanngullugu aamma Pituffimmi sulisartut kinaassutsiminnik isertuussisut ima allapput:

- Soorunami paasisinnaavarput USAF-ip isumaqatigiissut taama annertutigisoq amerikkamiunut tunniukkusummassuk, kisianni paasiuminaatsipparput qallunaat nunanut allanut ministeriaqarfiat illersornissamut isumaqatigiissummut taama paasinnissinnaammat.

- Pituffimmi suliffiit annaaneqarsinnaanerat ernummatigaarput, kisianni aamma
nunap sinneranut qanoq kinguneqarsinnaanera ernummatigalugu.

- Taamaammat isumaqarpugut apeqqutigut inuiaqatigiinni oqallinnermi pisariaqartut, aammalu politikerit akisussaasut uatsinnut inuiaqatigiinnullu ammasumik akisariaqartut.

Atuaruk: Greenland Contractorsip Thulemi kiffartuussinermik isumaqatigiissuteqarnera sivitsorneqassanngilaq

Powered by Labrador CMS