Pituffik
Pituffimmi kiffartuussinissamut isumaqatigiissutip annaaneqarnera Christiansborgimi pakatsissutigineqarpoq
USA-p Pituffimmiinnermini akiliisalertariaqartoq Siumumit piumasarineqarpoq. Kiffartuussinissamut isumaqatigiissummit annertunerusumik akiliisalernissaa aamma piumasaraat. - Suliaq politikkikkut qaqinneqassaaq, Pituffimmi kiffartuussinissamut isumaqatigiissutip annaaneqarnera Inuit Ataqatigiinnit qisuariarfigineqarpoq
Pituffimmi kiffartuussinissamut isumaqatigiissutip annaaneqarnera Christiansborgimi pakatsissutigineqarpoq.
USA-p Pituffimmi radareqarfeqarnermigut Kalaallit Nunaannut akiliisalertariaqartoq Siumumit Doris Jakobsen oqarpoq.
- Kalaallit Nunaata USA-p Pituffimmiinnerminut akiliuteqartalernissaanut piumasaqartalertariaqartoq siornatigut oqaatigisareerpara. Kiffartuussinissamut isumaqatigiissutip iluanaarutigineqartarnera allanngorarpallaarpoq, Doris Jakobsen Sermitsiaq.AG-mut oqarpoq.
USA-p Pituffimmi radareqarfeqarnera Kalaallit Nunaannit iluanaarutigineqarneq ajorpoq. Tamanna allanngortinneqartariaqartoq Doris Jakobsen oqarpoq.
- Kiffartuussinissamut isumaqatigiissutip iluanaarutaa allanngorarpallaarujussuarpoq. Radareqarfeqartoqarneranut aalajangersimasumik akiliuteqartoqartalertariaqarpoq. Kalaallit Nunaanni innuttaasunik oqalliseqateqaraangama aamma taamatut isumaqartarput, Doris Jakobsen oqarpoq.
Aningaasartuulli qanoq annertutigissanersoq oqaatigiumanngilaa.
- Kiffartuussinissamut isumaqatigiissummi iluanaarutigineqartartunit annertunerujussuusariaqarpoq, Siumumi politikkeri oqarpoq.
- Naalakkersuisut tamanna pillugit ullumi sisamanngornermi ataatsimeeqatigissavakka. Qanoq ingerlariaqqittoqassanersoq isumaqatigiilluta aalajangersussavarput, oqarpoq.
IA: Politikkikkut qaqinneqassaaq
Isumaqatigiissutip annaaneqarnera Inuit Ataqatigiinnit aamma pakatsissutigineqarpoq.
- Suliaq politikkikkut tunngassuteqarpoq taamaattumik politikkikkut qaqinneqassaaq. Danskit kalaallillu naalakkersuisuisa suliaq amerikarmiunut politikkikkut qaqittariaqarpaat, Inuit Ataqatigiit tusagassiuutinut nalunaaruteqarput.
Naalakkersuisut aamma qanoq suleqataasimanerat sumulluunniit attuumassuteqanngitsunit suliarineqartariaqartoq isumaqarput.
- Taaamatuttaarlu suli piumasaraarput uani pisumi Naalakkkersuisut sulisimanerat arlaannaanulluunniit attuumassuteqanngitsunit qulaajarneqartariaqartoq.
Piumasavarputtaaq qanoq danskit naalakkersuisuisa una pisoq qanoq suliarisimaneraat qulaajarneqartariaqarpoq. Isumaqarpugut annertusisamik danskit naalakkersuisui akissussaaqataasut sumi nalunaarsorneqarsimanissaannut akuersigamik. Nuannaaruti- gaarpullu januarimi folketingimi apeqquteqaat aallaavigalugu nukingertumik oqallittoqarnerani aalajangiisoqarmat. Amerikkami maalaaruteqartarfiup illersornissamut isumaqatigiissut aalajangiinerminni apeqqutaatissimanngilaat, taamaattumillu qallunaat naalakkersuisuisa amerikkarmiunut piumasaqartariaqarput pisussaaffitik naammasseqqullugit, folketingimi ilaasortaq Johan Lund Olsen aamma Sara Olsvig, IA-meersut, tusagassiuutinut nalunaaruteqarput.
DF aamma Venstre pakatsipput
Dansk Folkepartimit Søren Espersen suliap inernera pakatsissutigaa.
- Pakatsivunga kisianni tupaallanngilanga. Siumut Aleqa Hammond siuttoralugu kiffartuussinissamut isumaqatigiissutip USA-mit tigunearnissaanut suleqataapput. Taamaattumik taartisiaqartitsisoqarnissaanik maannakkut piumasaqartoqarsinnaanngilaq, Søren Espersen Sermitsiaq.AG-mut oqarpoq.
Nunanut allanut ministeri USA-mi isumaqatiginninniartariaqartoq Søren Espersen aamma oqarpoq.
Venstremit Flemming Damgaard Larsen aamma pakatsivoq.
- Pakatseqaanga. Qanoq iliuuseqartoqartinnagu Venstremi tamanna oqallisigeqqaartariaqarparput. Ernumagisatsitut aalajangiisoqarpoq, oqarpoq.