Pituffik
Pituffimmi isumaqatigiissutip atorunnaarallartinneqarnissaa USA-mit akuerineqanngilaq
Pituffimmi kiffartuussinissamut isumaqatigiissutip sivikillineqarnissaa Danmarkimit isumaqatiginninniutigineqarpoq. Isumaqatigiissut ukiumi ataatsimi atuutilernissaa anguniarneqarpoq
Pituffimmi kiffartuussinissamut isumaqatigiissummut tunngasumut sulissuteqartoqarpoq.
Pituffimmik kiffartuussinissaminik isumaqatigiissut suliffeqarfimmut Exelis Services A/S-imut tunniunneqartup ukiuni arfineq marlunni atuuttussaasoq ukiumi ataatsimi atuutsinneqarnissaanik danskit nunanut allanut ministeriat Martin Lidegaard USA-miunik isumaqatiginninniuteqarpoq. Tamanna isumasiorneqarnermini matoqqasumi nalunaarutigaa.
Isumaqatigiissut sivikillineqassappat nutaanik suliarinnittuussinissat aallartinneqassapput. Danmarkip USA-llu isumaqatigiissutigisareerpaat kiffartuussinissamik isumaqatigiissuteqarfigineqartoq kalaallit danskilluunniit suliffeqarfiat isumaqatigiissuteqarfigineqassasoq.
USA-mik isumaqatiginninniarnerit Martin Lidegaardip isumasiorneqarnermini saqqummiussimagai nordjyske.dk allappoq.
Suleqatigiissitat marluk
- Isumaqatiginninniarnerit ingerlalluarput. Kalaallit naalakkersuisui peqatigalugit USA-mik isumaqatiginninniarnivut pitsaasumik ingerlanneqarput, nunanut allanut ministeri nordjyske.dk-mut oqarpoq.
- Suliarinnittussarsiuinissami nalornissutigineqassanngilaq isumaqatigiissuteqarfigineqartoq suliffeqarfiussasoq Kalaallit Nunaannit imaluunnit Danmarkimit. Suleqatigiissitap aappaani Kalaallit Nunaata aningaasaqarnikkut piumasaqaataanik eqquutitsinissamik sulisussaq, nunanut allanut ministeri oqarpoq.
Suliffeqarfiit marluk Pituffimmi isumaqatigiissuteqarfigineqanngitsut suliaq ingerlateqqeqqammerpaat. Suliffeqarfiit tassaapput Per Aarsleff A/S aamma Greenland Contractors I/S.
Greenland Contractors amerikarmiut sakkutooqarfianni Pituffimmi kiffartuussinissamik isumaqatigiissuteqarpoq 1971-imili.
Kalaallit Nunaannit folketingimi ilaasortaasut oqaaseqartinniarlugit Sermitsiaq.AG sulissuteqarpoq.