Pituffik
Pituffik: Statsministeri aamma nunanut allanut ministeri isumasioqatigineqassapput
Pituffimmi kiffartuussinissamut isumaqatigissutip annaaneqarsimanera pillugu statsministerip aamma nunanut allanut ministerip isumasioqatigineqarnissaat Folketingimi partiinit - taamaattorli ilaatigut Siumut minillugu - aaqqissuunneqarpoq
(Allaaserineqartoq nalunaaqutaq 15.46 nutarterneqarpoq)
Folketingimi kalaallit partiivi marluk Inatsisartunilu partiit Pituffimmi kiffartuussinissamut isumaqatigiissutip annaaneqarsimanera politikkikkut suliani ukioq manna annertunersaagallarpoq. Christiansborgimi partiit pisoq aamma malinnaaffigineqangaatsiarpoq.
Pisoq pillugu danskit nunanut allanut ministeriat Martin Lidegaard, Radikale Venstre, partiinit apeqqarissaarneqarpoq januaarip 21-ani. Folketingip ataatsimiittarfiani isumaqatigiissutip annaaneqarsimanera pillugu ataatsimiittoqaqqittussanngorpoq. Tassani statsministeri Helle Thorning-Schmidt, Socialdemokraterne, aamma nunanut allanut ministeri Martin Lidegaard isumasioqatigineqassapput.
- Pituffik pillugu nunanut allanut ministerip isumasioqatiginerani decembarimi uanga aaqqissukkanni oqaaseqarfigineqanngitsut pingaarutillit isumasioqatigiinnermi eqqartorneqassapput. Apeqqarissaarnermi januaarip 21-ani aamma akissuteqarfigineqanngillat. Maannakkut statsministeri peqatigitillugu isumasiortoqassaaq, Folketingimi ilaasortaq Johan Lund Olsen, Inuit Ataqatigiit, ilisimatitsivoq.
Thorningimut Lidegaardimullu apeqqutit
Amerikarmiut allaffeqarfiini naalakkersuilu suut eqqartorneqarsimanersut assinganik aamma Nunatsinni naalakkersuisut allaffeqarfiinilu peqatigalugit suut eqqartorneqarsimanersut isumasioqatigiinnermi eqqartorneqassapput.
Inuit Ataqatigiit, Venstre, Konservative, Dansk Folkeparti, Enhedslisten aamma Liberal Alliance isumasioqatigiinnermi apeqquteqartuussapput
Paatsooqatigiinneq
Siumut aamma apeqquteqaateqartussaagaluartoq Siumut tunuliaqutaralugu Folketingimi ilaasortap Nick Nielsenip Sermitsiaq.AG-mut nassuiaatigaa.
Inuit Ataqatigiit Folketingimi siunnersortaata Lotte Brøns Symesip Venstremit Troels Lund Poulsenip aamma Siumumit Nick Nielsenimit attaveqaqatigiinnikkut paatsooqatigiissimasinnaanerat ajuusaarutigaa.
- Maili nassiunneqarsimasoq takuneqanngitsoorsimappat nassiutinngitsoorsimappalluunniit pisoq uggornarpoq. Kisianni tassa Siumut apeqquteqartunut ilaassanngilaq, Symes Sermitsiaq.AG-mut oqarpoq.
Isumasioqatigiinnissaq qaqagu ingerlanneqassanersoq ulluni aggersuni misissorneqassaaq.
Ameriarmiut suliffeqarfiat Vectrus Pituffimmi kiffartuussinissamik isumaqatigiissut tigussavaa oktobarimi. Greenland Contractorsip Pituffimmi sulineq ingerlatarigaluarpaa.