nikisititerineq

Pituffik pillugu suliaq Nielsenip sinniisussaajunnaarneranik kinguneqarpoq

Siumumit nalunaarutigineqartut naapertorlugit Pituffik pillugu suliap takutissimavaa Folketingimi misilittagalimmik ilaasortaqarnissaq pingaaruteqartoq

Nick Nielsen, naalakkersuisoq for uddannelse
Siumumeersoq Nick Nielsen

Siumup siulittaasuata Kim Kielsenip ilisimatitsissutigaa partiip Doris Jakobsen Folketingimi ilaasortatut iverteqqinnissaa aalajangiussimagaa ‘Siumup Kalaallit Nunaatalu Folketingimi nukittuumik sinniiseqarnissaa qulakkeerniarlugu’.

- Pingaartumik Pituffimmut tunngatillugu suliap takutippaa misilittagalimmik Naalakkersuisunillu suleqateqarsinnaasumik Folketingimi ilaasortaqarnissaq pingaaruteqartoq.

Taama Siumup siulittaasua aamma Naalakkersuisut siulittaasuat Kim Kielseni tusagassiuutinut nalunaaruteqarluni allappoq.

Imalu nangippoq:

- Taamaammat Folketingimut qinersisoqarnissaata tungaanut Doris Jakobsenip Naalakkersuisunut ilaasortaanerminit sulinngiffeqarallarnissaa akuersissutigaara. Taamaalilluni Siumup Kalaallit Nunaatalu Folketingimi nukittuumik sinniiseqarnissaa qulakkeerneqassaaq.

Atuaruk: Doris Jakobsen Naalakkersuisunit sulinngiffeqalerpoq

Doris Jakobsenip Folketingimut qinersisoqalerpat naalakkersuisuni ilaasortanerminut uteqqinnissaata tungaanut, naalakkersuisutut suliassaqarfii utaqqiisaangallartumik Siumumeersunut Martha Lund Olsenimut aamma Vittus Qujaukitsumut, tamarmik Naalakkersuisuni ilaasortaareersunut, akisussaaffigineqarallassapput.

- Doris Jakobsenip Folketingimut qinersisoqalerpat Naalakkersuisunut ilaasortatut atuuffiminut uternissaa qilanaarivarput. Suliassaqarfii qaammatialunni pissutsit taamaannerani Martha Lund Olsenimit Vittus Qujaukitsumillu paarilluarneqarumaarput.

Atuaruk: Doris sulinngiffeqarnini pillugu: Siumup kissaataa malippara

Siumup Nick Nielsen peersikkusuppaa
Doris Jakobseni Sermitsiaq.AG-mit apersorneqarluni oqarpoq Naalakkersuisunit sulinngiffeqarnera Siumup siulittaasuata aamma Siumup siulersuisuisa kissaateqarnerata kingorna pisoq.

Sermitsiaq.AG-mit Siumup siulittaasua aamma Naalakkersuisut siulittaasuat Kim Kielseni aamma Nick Nielsen Folketingimi Siumut sinnerlugu qaammatini marlungajanni sinniisussaareerluni maanna ilaasortaasimasunngortoq apersorniaraluaratsigu iluatsinngilarput.

Folketingimut kingusinnerpaamik septembarip 14-ani qinersisoqartussaavoq. Tassa ullut 216-it qaangiutsinnagit.

Pituffik pillugu suliaq sooq Nick Nielsenip Folketingimi ilaasortaajunnaarneranut pissutaanersoq aviisimi AG-mi atuarneqarsinnaavoq. Aviisi ataani pisiarineqarsinnaavoq:

Powered by Labrador CMS