Pituffik pillugu suliaq Folketingimi oqallisigineqassaaq

Folketingimi ilaasortaasut apeqqutitik akineqarnerat naammaginngilaat. Taamaammat Folketingimi oqallisigineqarnissaat siunnersuutigineqarpoq.

Nunanut allanut ministeri Martin Lidegaard Kalaallit Nunaat pillugu ataatsimiititaliami ilaasortanit akunnerni marlunni apeqqarissaarfigineqarpoq. Pituffimmi sullissinissamik isumaqatigiissut isumasioqatigiinnermi eqqartorneqarpoq. Inuit Ataqatigiinneersup Johan Lund Olsenip Finn Sørensen, EL, aamma Annette Vilhelmsen, SF, peqatigalugit nunanut allanut ministerip isumasioqatigineqarnissaanut qaaqquaat. Amerikarmiut suliffeqarfiata Danmarkimi aamma allaffeqartup sullissinissamik isumaqatigiissuteqarsimanerat annilaanganartoqartillugu isumasioqatigiinnissaq pilersippaat.

Apeqquteqartut oqarput erseqqissumik akissuteqarfigineqarsimanatik.

- Nunanut allanut ministerip apeqqutigut erseqqissumik akinngilaat. Taamaattumik Folketingimi tamanna pillugu oqallisigissavarput januaarimi, Johan Lund Olsen oqarpoq.

Apeqqutit pingaarutillit
Isumaqatigiissut naammaginanngitsumik ingerlasimanera pillugu nunanut allanut ministeri isornartorsiorneqarpoq. EU-p inatsisaa malillugu danskit suliffeqarfii kisimik neqeroorfigineqarsinnaanngitsut Martin Lidegaardip uteqattaagaa Johan Lund Olsenimit apeqquserneqarpoq.

Martin Lidegaardip oqaatigaa amerikarmiut suliffeqarfii qinnuteqarneranni Nunanut allanut ministeriaqarfik kammeradvokatimut suliassanngortinneqarsimasoq.

- Pituffik Kalaallit Nunaanniitsillugu USA-milu suliffeqarfiup qinnuteqarneratigut, danskit suliffeqarfiinit iluaqutigineqarsinnaanngilaq, isumasioqatigiinnermi Martin Lidegaard oqarpoq.

Akissutigineqartoq Johan Lund Olsenimit naammagineqanngilaq.

- Danmarkip EU-p maleruagassaanik malinninniarnera aamma apeqqusernarpoq, tamannalu akissuteqarfigineqartariaqarpoq. Taamaattumik tamanna pillugu Folketingimi apeqquteqaateqarfigineqassaaq.

- Kalaallit Nunaat EU-mut ilaasortaanngilaq, amerikarmiut suliffeqarfiat amerikarmiut sakkutooqarfianniittoq eqqartorneqarpoq, aamma taakku EU-mi ilaasortaanngillat.

Naalakkersuisut iliuuseqarsimanngitsut
Det Konservative Folkepartimit nunanut allanut ministeriusimasoq Per Stig Møller, Danmarkimi naalakkersuisuutitaqartut eqqartorneqartumut iliuuserisimasaat isornartorsiorpaa.

- Pisup ilungersunartuusinnaanera Danmarkimi naalakkersuisuutitaqartut kingusinaarlutik paasivaat. Naalakkersuisunit pisoq siusinnerusukkut iliuuseqarfigineqarsimasussaagaluarpoq. Suliffeqarfik Danmarkimeersuunanilu Kalaallit Nunaanninngaanneersuunngitsup sullissinissamik isumaqatigiissuteqarsimanera ajornartorsiutaasutut takuneqarsimasussaagaluarpoq, Per Stig Møller oqarpoq.

Suliffissaaruttoqarnissaa aarlerineqartoq
Amerikarmiut suliffeqarfiat sullissisunngorpat kalaallit suliffeqarfii isertitaallu suneqassanersut Siumumeersup Doris Jakobsenip arlaleriarluni apeqqutigaa. Akileraartarnikkut Kalaallit Nunaat annaasaqangaatsiassasoq oqaatigaa.

Kalaallit danskillu suliffissaqartinneqassasut apeqqummut nunanut allanut ministeri akissuteqarpoq. Aamma Nunatsinni inatsisit naapertorlugit Pituffimmi sulisut akileraartassasut oqaatigaa.

- Akileraarutigineqartartut paariinnarneqarnissaat neriuutigaara, killormuanilli pisoqassasoq qularutiginngilara, Doris Jakobsen oqarpoq.

Enhedslistenimeersup Sørensenip taama oqartoqarnera isumaqatigaa, kiisalu Nunanut allanut ministeriaqarfiup amerikarmiullu aallartitaqarfianni attaveqatigiissimanerat innersuuppaa.

- Amerikarmiut qanoq iliuuseqassanersut danskit kalaallillu naalakkersuisuisa ilisimanngilaat. Kalaallinik danskinillu sulisorineqarnissaammi pillugit isumaqatigiittoqarnikuunngilaq, Finn Sørensen oqarpoq.