Pituffik pillugu suliap killiffia IA-mit paasineqarusuttoq

Pituffimmi sullissinissamik isumaqatigiissut pillugu Inuit Ataqatigiinnit folketingimut ilaasortap Aaja Chemnitz Larsenip Danmarkip Nunanut Allanut ministerimut apeqquteqaateqarpoq.

Greenland Contractorsip sullissinissamut isumaqatigiissut Exelis Servicesimut annaavaa ukioq kingulleq. Suliffeqafik taanna amerikarmiut suliffeqarfiutigaat, Danmarkimili aamma allaffeqarluni.

Pituffimmi Danmarkimit suliffeqarfimmit sullinneqartussaasoq Venstre siornatigut oqariartuuteqareerpoq. Isuma allanngorsimannginnera Aaja Chemnitz Larsenip apeqquteqaatigaa.

Apeqqut maannakkut apeqqutigissallugu tulluartuuvoq, tassami nunanut allanut ministeri Nunatsinniippoq.

Apeqqut pillugu aamma folketingimi ilaasortap nunanut allanut ministerimut aggustip 27-ani ataatsimeeqateqarnerani eqqartorneqassaaq.

Amerikarmiut sakkutooqarfianni sullissinissamut isumaqatigiissutip Danmarkimi naalakkersuisuusimasut Venstremit tatisimaneqarput.

Tassani Kalaallit Nunaannit Danmarkimiilluunniit suliffiit Pituffimmi sullissisuunissaat piumasaqaatigineqarpoq. Aamma ilinniartunik sulisoqarnissaq kiisalu akileraartarnissat attatiinnarneqarnissaat aamma piumasaqaateqarfigineqarluni. Aamma sullissisuunissamut piumasaqaatiti siunissami qulakkeerlugit inissisimanissaat piumasarineqarluni.

Tamakkulu maannakkut Danmarkimi naalakkersuisuulersimasunut Aaja Chemnitz Larsen apeqquteqaateqassaaq.

- Pituffimmi sullissinissaq kikkunnit isumaqatigiissutigineqarnersoq pingaartorujussuuvoq, tamatumanimi pineqartut tassaapput kalaallit suliffissaat, sungiusarfissaat akileraarutitigullu isertitassaat. Maannakkorpiaq naluarput Pituffik pillugu isumaqatigiissutaagallartussaq siunissamilu isumaqatigiissutissaq Nunatta Karsianut – ajornartorsioreeqisumut - qanoq kingunerumaarnersut, Aaja Chemnitz Larsen oqarpoq.