Pituffik
Pituffik pillugu oqallittoqalinnginnerani neriunartoqartoq
Kiffartuussinissamut isumaqatigiissut Pituffimmiittup annaaneqarnera pillugu tuaviuussamik oqallittoqassaaq Folketingimi. Kalaallit Folketingimi ilaasortaasut isumaqatigiipput. Naalakkersuisut isumaqatigiissut suliarisariaqarpaat
Pituffimmi kiffartuussinissamik isumaqatigiissutip annaaneqarnera pillugu Folketingimi oqallittoqassaaq pingasunngorpat.
Inuit Ataqatigiinneersumut Johan Lund Olsenimut Siumumeersumiillu Nick Nielsenimut oqallinnissaq pingaaruteqarpoq. Kiisalu aamma Inatsisartuni illersornissamut ataatsimiititaliami ilaasortaasut oqallinnissaq aamma pingaartutut isigaat.
Nunanut allanut ministeri Martin Lidegaard, Radikale Venstreneersoq, isornartunik apeqqarissaarfigineqassaaq aqagu nalunaaqutaq 15.00-mit 17.00-ip tungaanut oqalliseqatigineqassaaq.
Oqallinnermut malitsigitiinnarlugu aalajangiissutissaq, Folketingimit taasissutigineqartussaq allanneqassaaq. Taamaaliornikkut Folketingip danskit naalakkersuisui kaammattussavai, Kalaallit Nunaanni innuttaasut Pituffimmi sakkutooqarfimmik – Amerikamiut atuisutut akilerneq ajugaannik - iluaqutissarsinissaat siunissamut qularnaaqqullugu.
Folketingimi amerlanerussuteqartut
- Nuannaarutigeqaara danskit naalakkersuisuinut ataatsimoorussamik inassuteqaateqarnissaq Folketingimi amerlanerussuteqarluartunit ilalerneqarniarpasimmat. Pituffimmi sullissinissamik isumaqatigiissut pillugu suliaq arlalinnik ernumanartoqarpoq, uannulli pingaaruteqarsimavoq Pituffimmi sullissinissamik isumaqatigiissutip danskinit/kalaallinit isumagineqartuarnissaata qularnaarnissaa, aamma naalakkersuisut kaammattorneqarnissaat, Amerikamiut sakkutuuisa Nunatsinniinnerannik annertunerpaamik Kalaallit Nunaata siunissamissaaq iluanaaruteqarnissaa sulissutigeqqullugu, tamatumunnga ilanngullugit ilinniarfissat, suliffissat akileraarutitigullu isertitassat. Aqagu pingasunngornermi oqallinnissaq qilanaarivara, Inuit Ataqatigiit tunuliaqutaralugit Folketingimi ilaasortaq Johan Lund Olsen oqarpoq.
Pituffimmi suliffissat aningaasarsiutaasinnaasullu allat attatsiinnarneqarnissaat Siumumit IA-miillu siunnertarineqarpoq. Isertissutaasummi Nunatta karsianut malunnaatilimmik isertitsissutaasarpoq.
Inatsisartunit Sara Olsvig, Inuit Ataqatigiit, aamma Atassummit Steen Lynge ataatsimiittoqarnerani najuutissapput.
Nunamut namminermut naalakkersuisoq Vittus Qujaukitsoq, Siumut, aamma Danmarkimiippoq ataatsimeeqataanermi peqataassalluni, Siumumit nalunaarutigineqarpoq.
Amerikarmiut suliffeqarfiat Exelis Services/Vectrus oktobarimit kiffartuussinissamut isumaqatigiissut tigussavaa. Greenland Contractors Pituffimmi kiffartuussinissamik isumaqatigiissummik oktobarip tungaanut ingerlatsissaaq.
Suliffeqarfiit Pituffimmi kiffartuussinissamik isumaqatigiissummut qinnuteqarsimasut maalaarutitik februaarip 20-aatinnagu nassiussinnaavaat, taannalu suliaq USA-mit suliarineqassaaq.
Pituffik pillugu Sermitsiami allaaserineqartut atuarneqarsinnaapput. Aviisi ataani pisiariuk: