Pituffik
Pituffik pillugu kalaallit siunnersuutaat Københavnip atorsimanngilaa
Nuummi nunanut allanut pisortaqarfiup Pituffimmi kiffartuussinissamut isumaqatigiissutip annaaneqannginnera sioqqullugu malittarisassanik nutaanik misiliigaluarput. Kisianni kalaallit siunnersuutaat atorneqanngillat
Nunanut allanut ministeriaqarfiup 2013-imi Pituffiup kiffartuunneqarnissaanut malittarisassat attatiinnarniarlugit aalajangiuppaa, naak tunngaviit taakkorpiaat qallunaanut kalaallinullu milliardilinnik naleqartumik kiffartuussinissamut isumaqatigiissutaannik annaasaqaataasussaagaluartut.
Tamanna sioqqullugu Nunatsinni nunanut allanut pisortaqarfimmi pisortap, Kai Holst Andersenip, malittarisassaat amerikamiunit siunnersuutigineqartut kingunissaat maluginiaraluarpai missingersuummillu pitsaanerusumik Københavnimut nassiussilluni.
Radiaviisi taama oqaluttuarpoq.
KNR-mi atuaruk: Nunatsinnit siunnersuutaasoq tusaanngitsuusaarsimagaat
Naalakkersuisut eqqartuussissuserisumik misissuisitsinerata, ippassaq tikillugu tusagassiuutinut tunniunneqarsimanngitsup, kiffartuussinissamut isumaqatigiissutip nalituup annaaneranut pissutaaqataasut ilaat erseqqissarpai.
Nalunaarusiaq suli tamakkiisumik saqqummiunneqanngilaq, kisianni oqaluttuarineqartut ilaannik uppernarsaapput, nalunaarusiarlu pisoq pillugu nutaanik paasissutissanik takussutissiivoq.
Nunanut allanut ministeriaqarfiup kalaallit sulinnittussarsiuussinermut malittarisassat allanngortinnissaannut siunnersuutaat isiginngitsuusaarsimaneri nalunaarusiami nutaarsiassartaavoq.
Eqqartuussissuserisoq Ole Spiermann ingerlatsivimmit Bruun & Hjejlemeersoq nalunaarusiami saqqummiunneqaqqammertumi isummerpoq, Danmarkimi nunanut allanut ministeriaqarfik, naalagaaffiup nunanut allanut tunngasunut oqartussaaffiinik suli akisussaasuusoq, Nuummi nunanut allanut pisortaqarfimmeereerluni malittarisassanik allannguinissamik aalajangersimasoq.
Aleqa suliarinnittussarsiuussineq pillugu aalajangiiumasimanngitsoq
- Tulliani malittarisassat qallunaat aamma amerikamiut kissaateqarnerisigut allanngortinneqarput, tamatumalu inernera malunnaatilimmik siullermut sanilliullugu qallunaat kalaallillu suliffeqarfiutaannut tunngassuteqarnera ajornerusumik isikkoqalerluni, nalunaarusiami taama allaqqavoq.
Atuaruk: Qujaukitsoq: Thulemut isumaqatigiissut Naalakkersuisuusimasut pingaartissimanngilaat
Namminersorlutik Oqartussat nalunaarusiaanni pingaarnertut inerniliissutigineqarpoq, Kalaallit Nunaanni suliarinnittussarsiuussinermut malittarisassat nutaat akuerineqarmata, Nuummi nunanut allanut pisortaqarfik politikkikkut naalakkersuisuusimasumit Aleqa Hammondimit tunuliaqutaqarani iliuuseqarsimasoq.
Taamaattorli atorfilittat naapertorlugit, Hammondip nammineerluni suliami aalajangiinissani kissaatigisimanngilaa, allaffissornikkut suliassatut tamanna isigigamiuk.
Maanna nunanut allanut ministeriusoq, Kristian Jensen (V), nalunaarusiaq saqqummiunneqartoq KNR-mut oqaaseqarfigiumasimanngilaa.