Pituffik pillugu isumaqatiginninniarneq angusaqarfiussasoq Sukap suli neriuutigaa

Pituffimmi siunissamut kiffartuussinissamut isumaqatigiissutissat pillugit isumaqatiginninniarnerit angusaqarluarfigineqarsinnaasut nunanut allanut naalakkersuisup Suka K. Frederiksenip upperaa. Tamanna tusagassiutinut nalunaarutigaa.

Paasissutissat KNR-ip pissarsiarisimasai naapertorlugit, Pituffimmi kiffartuussinissamik isumaqatigiissutip siunissami suliariumannittussarsiuunneqarnissaanut aaqqissuussinerit nutaat assigiinngitsut marluk 2016-imi decembarip qaammataani ukioq mannalu januaarip qaammataani akueriumasimanngilai. Suka K. Frederiksenip suliaq isertuussaammat toqqaannartumik oqaaseqarfigiumanngilaa, imali allappoq:

- Pituffimmut suliami Kalaallit Nunaata/Danmarkip USA-llu akornanni isumaqatigiinniarneq ingerlaqqippoq. Taamaattorli soorunami maanna isumaqatigiinniarnerit imarisai immikkuualuttut ilisimatitsissutigisinnaanngilavut.

Isumaqatiginninniarnerit Nunatsinnut angusaqarfiulluarsinnaaneri suli upperineqarpoq.

- Nunanut allanut tunngassutilinni akisussaasuunerma nalaani isumaqatigiinniarnerit arlaannaatigulluunnit unittoorsimanngillat, ilisimasatsitulli suna tamarmi piffissamik tigusisarput, siusinnerusukkullu ilisimatitsissutigeriikkattut suli periarfissanik aqqutissaqarpoq.

Suliaq ammasumik suliarineqassanngitsoq neriuutigaa.

- Isertuussisussaatitaanermik, taamaalilluni akaareqatigiinnermik tatiginassutsimillu takutitsinnginneq ajoraluartumik suliap inernissaanut nunatsinnullu iluaqusissaanissaraluanik innarliisinnaavoq.

Toqqaannanngikkaluamik Vittus Qujaukitsumut isornartorsiuivoq.

- Naggasiutigalugu naqissuserusuppara siornali aprilimi isumaqatiginniarfitsinnut tatiginassuserput pilerseqqinniarlugu sulineq ingerlanneqarpoq, tassani diplomatiimi ingerlaffissat malinneqarnissaat, taamatullu isumaqatigiinniaqatitut tutsuiginartuunissarput kissaatigilluinnarpara.