Pituffik pillugu filmiliarineqartoq naliliisartut nersualaarpaat

Pituffimmi timmisartoq sisamanik qaartartunik useqarluni nakkartoq oqaluttuaavoq pissanganartoq.

Naalagaaffeqatigiinneq pillugu filmi 'Idealisten' paasissutissanik imaqarluartuusoq naliliisartut oqariartuuteqarput.

Filmimi DR-imi tusagassiortoq Poul Brinkiugaluaq pillugu sammineqarpoq. Timmisartup nakkareernerata ukiut 20-t qaangiunneranni paasivaa timmisartup nakkareernerata kingorna sulisuusut qinngornernik ulorianartunik qinngorneqarsimasut, napparsimalersimasullu.

Filmi torrallataasutut Informationenimit nalilerneqarpoq.

- Filmi nipilersuup silarsuaa malillugu sanaajuvoq, tassami pissanganartortaqartorujussuuvoq, ilaatigut taama naliliisoqarpoq.

Jyllands-Postenip naliliisartuata filmip ilitsersuisua Christina Rosendahlip suliaa 'Idealisten' ullorissani arfinilinni tunniunneqarsinnaasuni tallimanik tunivaa.

- Oqaluttuaq neqitaqarluartuusoq ilitsersuisup ilisimalluarpaa, tamanna filmimi takuneqarluarsinnaavoq, aviisi allappoq.

Danmarkip oqaluttuarisaaneranut pingaarutilik
Isiginnaartitsisartup Peter Plauborgip Poul Brinkiusaarnera naliliisartunit nuannarineqarluarpoq.

Politikenip naliliisartuata ullorissanik sisamanik filmi tunivaa, filmimi Danmarkip oqaluttuarisaaneranut pingaaruteqartuusoq oqaatigalugu. Inuilli ilisimaneqartut suli inuusut filmimi peqataatinneqarnerat nuannarivallaanngilaa.

- Filmimi Uffe Ellemann-Jenseniusaartoqarnera Niels Helveg Petersen-iusaartoqarneralu pitsaavallaanngilaq.

Nuummi takutinneqaqqaartoq
Filmi paasissutissaqarpallaartoq Ekstra Bladep naliliisartua naliliivoq. Kisianni filimi suliarineqarluartuusoq aamma oqaatigineqarpoq.

- Filminut soqutigisaqarluartunut 'Idealisten' soqutigineqarpallaarnaviarunanngilaq, kisianni pisumut soqutigisalinnut una filmi nuannarineqarluartussaagunarpoq.

Aviisip filmi ullorissanik sisamanik tunivaa.

Filmi 'Idealisten' Nuummi kulturikkut illorsuarmi Katuami marsip 19-ani takutinneqaqqaarpoq.