Pituffik
Pituffik pillugu filmi pissanganartoq Nuummi takuteqqaarneqassaaq
Danskit Pituffik pillugu filmiliaat kulturikkut illorsuarmi Katuami takutinneqaqqaassaaq. Filmi Danmarkimi sapaatit akunneri pingasut qaangiuppata takutinneqaqqaassaaq
Christina Rosendahlip filmi pissanganartuliaa 'Idealisten' Katuap filmertarfiani Nuummiittumi nunarsuaq tamakkerlugu siullermeerluni takutinneqaqqaassaaq sisamanngornermi marsip 19-ani.
Danmarkip oqaluttuarisaanerani pisut isertuussaanerpaat alutornarnerpaallu ilaat, 1968-imi pisimasumik aallaavilik, amerikamiut timmisartuat B-52 brintimik qaartartulianik useqarluni sikumut nakkarmat amerikamiut sakkutooqarfiata Pituffiup ungasinngisaani pisoq filmip imaraa.
Filmimi ilitsersuisoq Christina Rosendahl filmi Nuummi takutinneqaqqaalerpat peqataassaaq.
- Qujamasuutigeqaara filmip nunarsuaq tamaat takuteqqaarneqarnissaanik tamaani ingerlatsinissarput Katuaq Biop akuersissutigisimammagu. Poul Brinkip Pituffimmi sulisut pillugit saqqumiisarnerata paasinarsisippaa, innuttaasut danskit kalaallillu Danmarkip atomimik politikkia isertuussaq pissutigalugu ukiuni 40-ni salloqittarneqarsimasut. Aamma Kalaallit Nunaat sammisami uani qitiulluinnarpoq taamaammat 'Idealisten' maani takuteqqaassallugu pissusissamisoorpoq, tusagassiuutinut nalunaarummi Christina Rosendahl oqarpoq.
Danmarkimi apriilip qulingiluaani takutinneqaqqaassaaq
'Idealisten' Poul Brinkip atuakkiaa tunisaalluartoq Thulesagen – Løgnens univers (Thule pillugu suliaq – sallup silarsuaa) Danmarkimi apriilip qulingiluaanni filmertarfimmi takuteqqaarneqassaaq.
Filmimi Peter Plaugborg aamma Søren Mallingip saniatigut inuttarai, Thomas Bo Larsen, Arly Jover, Jens Albinus aamma Robert aamma Bodil-imik nersornaasigaasimasoq Henrik Birch. 'Idealisten'-ip filmiliarineqarnissaanut Lars K. Andersen, Simon Pasternak, Birgitte Stærmose aamma Christina Rosendahl allaaserinnittuupput filmiliarineqarluni Toolbox Film.
'Idealisten'-ip traileria qulaani takuneqarsinnaavoq