Pituffik: Ministeri alla isumasiorneqartussanngorpoq

Pituffimmi kiffartuussinissamut isumaqatigiissutip annaaneqarneranut ministerit marluk isumasiorneqartareerput. Inuussutissarsiornermut ineriartortitsinermullu ministeri Henrik Sass Larsen, Socialdemokraterne, tullinnguulluni isumasiorneqartussanngorpoq.

Finans sisamanngormat allappoq.

Pituffik pillugu statsministeri Helle Thorning-Schmidt, Socialdemokraterne, aamma nunanut allanut ministeri Martin Lidegaard, Radikale Venstre, isumasiorneqartareerput.

Nunanut allanut ministeriaqarfiup USA-p saaffiginnissutaanut Inuussutissarsiornermut aqutsisoqarfimmut ingerlatitseqqissimanera pissutaalluni Inuussutissarsiornermut ineriartortitsinermullu ministeri isumasiorneqartussanngorpoq. Inuussutissarsiornermut aqutsisoqarfiup misissorpaa Exelis Services nunanit allanit suliffeqarfiutigineqarnersoq pillugu misissuisussatut innersuunneqarpoq. Taamaakkaluartorli USA-p silaannakkut sakkutuuisa annertunerusumik tamanna paasisaqarfiginngilaat.

Folketingimi Kalaallit Nunaannut Ataatsimiititaliami ilaasortaasut, Inuit Ataqatigiinnit Johan Lund Olsen aamma Enhedslistenimit Finn Sørensen, Inuussutissarsiornermut ineriartortitsinermullu ministerip isumasiornissaanut qaaqquaat.

Nunanut allanut ministerip Martin Lidegaardip Pituffimmut suliariumannittussarsiornermut suliaq USA-mut unitsikkallaqugaa Finans sisamanngormat allappoq.

- Aamma tassani kaammattuutigivara amerikamiut silaannakkut illersornissamut sakkutooqarfiata kiffartuussisussarsiorneq atorunnaarsikkallartariaqaraa USA-p, Kalaallit Nunaata Danmarkillu aaqqiissutissamik nassaarnissaasa tungaanut, Martin Lidegaard Finansimut oqarpoq.

Nunanut allanut ministerip amerikamiut akissuteqarnissaat maanna utaqqivaa.