Aalisarneq

Pitsaanerusumik unnuiffissaqalermat tunisat annertusipput

Umiatsiaararsorlutik aalisartut Aappilattumut tunisiartortut, Royal Greenlandip siniffissamik pitsaasumik neqeroorfigisarpaat

Assimi illu saamerleq aalisartut Aappilattumi unnuisarfittaaraat

Aalisartut Aappiluttup eqqaaneersut nunatta kujaterpiaani umiatsiaararsorlutik aalisartut Aappilattumi unnuiffissaqalermata Royal Greenlandip tunisassiorfianut tunisat annertusipput. Royal Greenlandip nittartagaa ilisimatitsivoq.

Amerlanerusut aalisalertut
- Juulip aallartinnerani aalisartut Aappilattup eqqaani nunaqarfinneersut illoqarfinneersullu illu unnuisarfissaat ammarneqarmalli umiatsiaararsorlutik aalisartut Nanortalimmeersut Narsaq Kujallermeersullu arlaqartut Aappilattumi Royal Greenlandip tunisassiorfianut tunisisalermata tunisat annertusipput, Narsami Royal Greenlandip tunisassiorfiani pisortaq aamma Aappilattumi tunisassiorfimmi nakkutilliisoq Niels Sakariassen oqarpoq.

Oktobarimi pisiarineqartoq
Aalisartut Aappilattup eqqaani nunaqarfinneersut illoqarfinneersullu nunatta kujaterpiaani aalisariaraangata unnuiffissaqarnissaannut periarfissaqartikkumallugit Royal Greenland Aappilattumi oktobari 2015-imi illusivoq.

Illu ilaqutariinnut illutut sanaajusoq sisamanik initaqarpoq igaffeqarluni inunnut arfineq pingasunut siniffissaqarpoq. Illu maanna nutarterneqareerluni nutaaliaasunik atortorissaarutilersorneqareerpoq.

2014-imi ammaqqinneqartoq
Nunaqarfimmi avinngarusimasumiittumi Aappilattumi tunisassiorfik ukiorpaaluit matoqqareerluni 2014-imi novemberimi ammarneqarpoq.

Atuaruk: Halibut Aappilattumi fabrikkiliussaaq

Tunisassiorfik sisamanik sulisoqarpoq. Tunisassiorfimmi ullormut tonit sisamat tunisassiarineqarsinnaapput.

Powered by Labrador CMS