Tasiilaq
Piteqqamik eqqugaasut Naalakkersuisut ikiorniarpaat
Piteqqap qanoq annertutigisumik aserorterisimaneranik Naalakkersuisut Kommuneqarfik Kommuneqarfik paasiniaaffigaat, Knud Kristiansen oqarpoq
Innuttaasut nalussanngilaat qanittukkut Tasiilami piterarnerani erloqinartumik eqqugaasut Naalakkersuisut ikiorusummatigit.
Taamatut tusagassiorfinnut nalunaarutikkut erseqqissaavoq Naalakkersuisut siulittaasorigallagaat Knud Kristiansen.
Amerlasuut eqqorneqarput
Taassuma erseqqissarpaa Naalakkersuisut nalunngikkaat piteqqap Tasiilami innuttaasorpassuit eqqorsimagai atortorpassuarnillu aserorterisimasoq. Politikerillu nalunngikkaat pisut taamaattut ajornartorsiuterujussuarnik pilersitsinnaasartut.
Ikioqatigiilluni
– Matumani ikioqatigiinnissarput pisariaqartipparput. Oqaatigisinnaavaralu Naalakkersuisut borgmesteri Asii Chemnitz Narupimit saaffigineqaqqammersut, Namminersorlutik Oqartussat ikiorsiissutissaat pillugit, Knud Kristiansen paasissutissiivoq.
Ingerlaannaq iliuuseqarpoq
Naalakkersuisut ilalernartippaat innuttaasut piteqqamik eqqorneqarsimasut sillimmateqanngitsullu ikiorniarlugit, kommuni suliniutinik arlalinnik sukkasuumik aallartitsisimammat.
Paasiniaaffigaat
– Innuttaasut taamatut atugaqarneranni Naalakkersuisut ikiorusuppaat, inatsisitigut aningaasaqarnikkullu atugassarisat iluanni, kommunilu suleqatigalugu. Naalakkersuisullu maanna kommuni paasiniaaffigaat piteqqap ajoqusiineri qanoq annertutiginersut, kiisalu qanoq isilluni siunertaqarnerpaamik ikiorsiisoqarsinnaanersoq, Naalakkersuisut siulittaasorigallagaat allappoq.