Tasiilaq
Piteqqamik eqqugaasunut Kalaallit Røde Korsiat aningaasanik ikiorsiivoq
Tasiilami piterarnerani ilaqutariinnut eqqugaanerpaasunut kattuffiup siulersuisui 50.000 koruuninik tunissuteqarput
Kalaallit Røde Korsiata nuna tamakkerlugu siulersuisui aalajangerput, Tasiilami ataasinngornerup novembarip 23-ata unnuaani ualeq angullugu sivisussusilimmik piterarnerani ilaqutariinnut eqqugaanerpaasunut 50.000 koruuninik tunissuteqarniarluni.
Siulersuisut isumaqatigiissut
Anorersuup illunik pigisanillu allanik aserortererujussuarsimanera oqaluttuarineqareersoq nuna tamakkerlugu siulersuisut isumaqatigiillutik taamatut aalajangersimasut Kalaallit Røde Korsiata nalunaarutigaa.
Kommuni isumasioqatigalugu
Kalaallit Røde Korsiannit aningaasatigut ikiorsiissutit kikkunnut tunniunneqassanersut Kommuneqarfik Sermersuumi Tungiuinermut immikkoortoqarfik suleqatigalugu aalajangerneqassaaq, taassumalu ikiorsiissutit Tasiilami ilaqutariinnut pisariaqartitsinerpaanut tunniutissavai.
Aningaasaateqarfiit marluk
Kalaallit Røde Korsiat aningaasaateqarfeqarpoq marlunnik tamarmik 100.000 koruunit sinnerlugit aningaasaatilinnik.
National Fond (Nuna tamakkerlugu Aningaasaateqarfik) ikiorsiissuteqartarpoq Kalaallit Nunaanni pinngortitap ajunaartitsinerani imaluunniit allanik sualuttumik pisoqarnerani, ingerlaannavik ikiorneqarnissamik pisariaqartitsiffiusuni. Ikiorsiissutit pingaartumik sumiiffimmi inuiaqatigiinnut tunniunneqartarput, aammattaarli inuit ilaqutariilluunniit ataasiakkaat ikiorserneqarsinnaapput. Siunertanut pisortat pisussaaffiisa iluaniittunut ikiorsiisoqarsinnaanngilaq.
Ikuallannersuaq
Nuna tamakkerlugu Aningaasaateqarfik kingullermik ikiorsiissuteqarpoq 2012-imi Ilulissani ikuallarujussuarneranut atatillugu, taamanikkut ilaqutariit 15-it angerlarsimaffeerummata.
Ajunaarnersuarmi ikiorsiissutit
Internationa Fondikkut qulakkeerneqassaaq tamatigut aningaasanik pissamaateqartarnissaq, taamaasilluni nunani tamalaani ajunaarnersuaqartillugu Kalaallit Røde Korsiat sukkasuumik ikiorsiissuteqarsinnaalluni, Danmarkimi Røde Korsimut aningaasanik ingerlatsitsilluni.
Taamaasilluni International Fondimit nunarsuarmi ajunaarnersuaqarnerani ikiorsiissutt aamma National Fondimillu ikiorsiissutit imminnut attuumassuteqanngillat, Kalaallit Røde Korsiat erseqqissaavoq.