aallakaatitassiaq
Pisuusaartitsilluni kalaallisut aallakaatitat siullersaat aallartilerpoq
Aappariiluarnerulernissaq anguniarlugu pisuusaartitsilluni kalaallisut aallakaatitassiat siullersaanni siunertaavoq
Aappariippugut!?
Tassaavoq pisuusaartitsilluni aallakaatitassiap KNR-TV-mi ataasinngornermi unnukkut nalunaaqutaq 20.00 aallakaatinneqartussap qulequtaa marloqiammik isumaqarsinnaasoq. Torluuseraanni aappariinnermut naqissusiineruvoq apersuuseraannilu appariinnerluni apeqqutaalluni.
Atuaruk: Aappariinneq pillugu kalaallisut aallakaatitassiaq nutaaq
Aallakaatitassiami peqataasussarsiorluni misiliititsisoqarnikuuvoq tamatumalu kingorna aappariit pingasut qeqertaliaanneqarput assigiinngitsunik unammilligassaqartinneqarlutik.
- ’Aappariippugut!?, tamatumanimi pineqarmat aappariit qanoq oqaluulluarsinnaanersut, imminnut tusarnaarsinnaanersut aammalu qamuuna pigisaminnik qanoq avitseqatigiissinnaanersut. Tassalu qanoq aappariinnermi nammineq inissisimasinnaanersut - nuannaarsinnaanersut, aliasussinnaanersut, annussinnaanersut aammalu qanoq illaqatigiittoqarsinnaanersoq. Taamaattumik pingaaruteqarpoq aallakaatitassiat malinnaaffigilluarnissaat, aallakaatitani ilisarititsisoq Angajo Lennert-Sandgreen oqarpoq.
Inuusuttunut sammititaq
Peqataasuut kisimiitsillugit qeqertannguamut inissinneqassapput, tassalu taakkuinnaallutik Angajo tarnillu pissusaanik nakorsaq Inuk peqatigalugu misileraanerit assigiinngitsut ingerlatissallugit, misileraanerit tamarmik toqqissisimanarnerusumik tatigiffiunerusumillu aappariinnerup ingerlasinnaanissaanut aqqutissiuussisussat.
Facebook atorlugu aamma malinnaasoqarsinnaavoq tassani takuneqarsinnaallutik qanoq iliorluni aappariinneq nuannersoq anguniarneqarsinnaanersoq. Tassani aalakaatitassianit tigulaakkat, eqqoriaasitsinerit, unammissutit akissarsiassartallit takuneqarsinnaapput.
Aallakaatitani saaffigineqartut tassaapput inuusuttut 15-it 30-illu akornannik ukiullit.