Pituffik
Pisut ataatsimut isigalugit: Exelis Services ima isumaqatigiissuteqarfigineqarpoq
Pituffimmi kiffartuussinissamut isumaqatigiissutip aaqqiagiinngissutaa nunanut allanut ministerip Martin Lidegaardip misissussavaa
Annonse
Suliffeqarfiup Exelis Servicesip Pituffimmi kiffartuussinissamut qanoq isumaqatigiissuteqarfigineqarsimanersoq Danmarkimit misissorneqassaaq.
Suliaq pillugu ima ingerlavoq:
- Pituffimmi kiffartuussinissamik isumaqatigiissusiornermi Danmarki 2013 tikillugu aalajangiisuusarpoq.
- Danmarkip, Kalaallit Nunaata USA-llu qaammatini amerlasuuni isumaqatiginninniutigaat kiffartuussinissamik isumaqatigiissutigineqartoq suliffeqarfik Danmarkiminngaanniissasoq Kalaallit Nunaanninngaanneersuussanersorluunniit. Taamaaliorput 1950-ikkunni isumaqatigiissut aallaavigalugu.
- EU-p inatsisaanik unioqqutitsinnginnissaq aallaavigalugu Danmarkip aalajangerpaa suliffeqarfik USA-mit ingerlanneqartoq isumaqatigiissuteqarfigineqassasoq. Kammeradvokatip aasami 2013-mi mianersoqqusineratigut tamanna pivoq.
- Exelis Services amerikarmiut illersornissakkut suliffeqarfiutaannit Vectrusimit pigineqartoq kiffartuussinissamut isumaqatigiissuteqarfigineqarpoq 2014-ip naanerani. Isumaqatigiissut katillugit 2,5 milliarder koruuninit missaannik naleqarpoq naatsorsuutigineqarpoq ukiunilu arfineq marlunni atuutissalluni.
- Suliffeqarfiit pingasut kiffartuussinissamut isumaqatigiissummut qinnuteqarsimasut maalaaruteqarput. Maleruaqqusat malinneqarsimanngitsut oqaatigaat.
- Sulifffeqarfiit qinnuteqartut ilaat nunanit allanit ingerlanneqarnerat maalaaruteqarnerminnut tunngaviusoq JyllandsPosten allappoq.
- Kiffartuussinissamik isumaqatigiissuteqarfigineqartoq Exelis Services oqarpoq inatsisit naapertorlugit ingerlasoqartoq.
- Maalaaruteqartuupput MT Højgaardimit 67 proventimik pigineqartoq Greenland Conctractors, Per Aarsleff aamma Copenhagen Arctic. MT Højgaard suliffeqarfinnit ilaannakortumik Højgaard Holdingimit aamma Monberg & Thorsenimiillu pigineqarpoq.
- MT Højgaardimik nalunaarutigineqartareerpoq kiffartuussinissamut isumaqatigiissutip annaaneqarneranut aningaasarpassuit annaanneqartut.
- Amerikamiut suliarinnittussarsiussinermi naammagittaalliortarfiata maalaarutigineqartoq atortussaatinngilaa februaarip arfineq pingajuanni 2015-mi.
- Greenland Contractors Pituffimmi kiffartuussinissamut isumaqatigiissuteqarfigineqarpoq septembarip 30-ata tungaanut. Tassanngaannit isumaqatigiissut Exelis Servicesimit tiguneqassaaq.
- Exelis Services A/S-ip kiffartuussinissamut isumaqatigiissummik tunineqannginnerani qaammatit pingasut sioqqullugit amerikarmiut silaannakkut sakkutuui danskit nunanut allanut ministeriaqarfiannut saaffiginnissuteqarput. Suliffeqarfik qanoq inissisimanersoq paasiniarneqaraluarpoq.
- Nunanut allanut ministeriaqarfiup maili nassiussaa, Finansimit pappiliaatinik paasissutissanik qinnuteqareernermi kingorna pissarsiarineqartumi, allaqqavoq inuussutissarsiornikkut atukkat ilisimaneqanngitsut. Tamanna professorimit politikkeriniillu isornartorsiorneqarpoq.
- Amerikarmiut silaannakkut sakkutuuinik attaveqatigiissimanerup isornartorsiorneqartup misissorneqarnissaa Nunanut allanut ministerip Martin Lidegaardip atorfilittat suliakkippai. USA-p silaannakkut sakkutuuisa Exelis Servicesip kiffartuussinissamik isumaqatigiissummik tunivaat.
- Namminersorlutik Oqartussanit aamma suliamut tunngatillugu qanoq suleriuseqarsimanersoq Naalakkersuisunit misissorneqassaaq.
Paasissutissat: Jyllands-Posten aamma Ritzau