Sulisartoqarneq
Pissutsit taamaanngillat, Doris
Doris Jakobsenip nunatsinni entreprenørini atorfeqarnermi pissutsinik isorinninnera Permagreenip akissuteqarfigaa
– Isummiutiinnakkat pissusiviusunik tunngaveqanngitsut, taamatut oqarpoq Permagreenip pisortaa Preben Kold Larsen, Doris Jakobsenip oqarneranut "kalaallit sanasut Permagreenimi sulisinnaanngitsut piffiit suliffiit naammaginanngitsut pissutigalugit".
– Permagreen nunaqavissuinnangajavinnik sulisoqarpoq, Preben Kold Larsen erseqqissaavoq.
– Immikkoortortaqarfitsinni tallimani sulisutsinnit 300-t missaanniittunit 90% angullugu nunaqavissuupput, taakkualu 75%-iisa missaanniittut Kalaallit Nunaanni inunngornikuupput.
– Permagreen taamaasiorsinnaasimavoq ukiuni arlalinni lærlinginut politikkini annertusarsimagamiuk. Sanasutut, qalipaasutut mekanikeritullu ilinniartunik 25 aamma 30 akornanni lærlingeqartuaannarlutalu praktikkertoqartuaannarpugut, kiisalu inuusuttunik ingeniøritut ilinniagaqartunik sulisoqarluta, Permagreenip pisortaa oqarpoq.
Taassuma oqaatigaa kisitsisitigut paasissutissat uppernarsarneqarsimasut misissuinermi, Kalaallit Nunaanni Naatsorsueqqissaartarfiup Permagreen sinnerlugu ukiumi naatsorsuusiorfiusuni 2012-mi ingerlassimasaani.
– Misissuinerup uppernarsarpaa ukiup ingerlanerani inuit 473-it sulisorineqarsimasut, taakkua 86%-ii nunaqavissuullutik, taakkualu 70%-ii Kalaallit Nunaanni inunngorsimasuullutik. Misissuinermi pissutsit allarpassuit qulaajarneqarput, Doris Jakobsenilu kajumissaassavara taanna atuaqqissaaqqullugu. Misissuineq tamarmi takuneqarsinnaavoq uani www.permagreen, tassanissaarlu 2013-imi septembarimi Sermitsiami allaaserisaq takuneqarsinnaavoq, Preben Kold Larsen oqarpoq.
Ilanngulluguli oqaatigaa ilumoortoq Permagreen sulisoqartoq sapaatip akunneranut nalinginnaasumik sulinerup saniatigut annertuumik suliaqartartunik, pingaartumik aasaanerani.
– Nunarsuarmi inissisimaffipput pissutigalugu ukiumut qaammatinik 5-6-inik suliassanut, qaammatini qulingiluani suliassaagaluartunut, piffissaqartassaagut, sapaatip akunneranut akunnerit 40-t sulisoqartassappat. Sammisaqarfimmi pissutsinut tamanna DNA-tut takussutissaavoq, tassa aasaanerani sapaatip akunneranut amerlanerpaat akunnerit 50-t missaanni sulisarmata, Preben Kold Larsen oqarpoq, erseqqissarpaalu Permagreenimi atorfillit atorfinitsitaanermut isumaqatigiissuteqartut sapaatip akunneranut akunnerni 40-ni sulisassasut, isumaqatigiissut naapertorlugu. Sulisulli amerlanerpaartaat qaammatisiutit malillugit ukiumi sapaatip akunneranut agguaqatigiissillugu akunnerni 45-ni sulisarput, pisortaq paasissutissiivoq.
– Doris Jakobsen kajumissaassavara politikkikkut sunniuteqarnii atorlugu ingerlatsineq sunnerniaqqullugu, inuiaqatigiillu sanaartugassanut assigiinngitsorpassuarnut piffissamut sivisunerusumut pilersaarusiorsinnaalersillugit. Sanaartugassarpassuit sivikitsuararsuarmik piffissalerlugit saqqummiunneqartarput, piffissarlu sivikitsoq atorlugu naammassineqartassallutik, Preben Kold Larsen nassuiaavoq, isumaqarporlu tamanna sulinermi tatineqarnerujussuarmut pissutaaqataasoq.