Pissarsiorneq taamaatippoq: Peqqissaasut siulittaasutaarput

Ukiuni tallimani peqqissaasunut siulittaasooreerluni, Inuuti Fleischer, peqqinnissaqarfimmi toqqaannartumik atorfeqaleqqinniarluni tunuarpoq.

Peqqissaasut Kattuffiata siulersuisui taamaattumik siulittaasup tullia, Olga P. Berthelsen, siulittaasuugallartussanngortippaat, kattuffik taama ilisimatitsivoq.

- Olga P. Berthelsen tamakkiisumik taperserpara, neriuppungalu siulittaasutut tigulluassagissi, soorlu uanga siulittaasunngorama, Inuuti Fleischer kattuffiup nittartagaanut taama allappoq.

Peqqissaasut pisortaat
Inuuti Fleischer decembarip aallaqaataani Peqqinnissaqarfik Sermersuumi peqqissaasut pisortaattut atorfinissaaq.

Olga P. Berthelsen 2009-mit 2013-mut Inuit Ataqatigiit tunuliaqutaralugu Inatsisartuunini ilisarisimaneqaatigaa.

Taanna ulluinnarni Kommuneqarfik Sermersuumi atorfeqarpoq, kattuffimmilu siulittaasumik ueqarpoq, tassalu SIK-mi siulittaasoq Jess G. Berthelsen.

Taasinerit arlallit
Peqqissaasut Kattuffiannut siulittaasussarsiorneq ajornaatsuinnaasimanngilaq.

Kattuffik marloriarluni immikkut ittumik siulittaasumik qinersititsivoq, siulittaasutulli qinigassanngortittoqarani.

Ukioq manna novmberimi ataatsimeersuartoqarnerani Olga P. Berthelsen siulittaasup tulliatut qinerneqarpoq, tullianilu septemberimi 2016-mi qinersisoqaqqinnissaanut siulittaasuussalluni.

Ilaasortat tamarmik taasinerat
Kattuffiup siulittaasua ilaasortat tamarmik taasineritigut toqqarneqartarput, siulersuisunilu ilaasortat ataatsimeersuarnermi toqqarneqartarput.

Aamma atuaruk: Meeqqanut immikkoortoq ullutsinnut naapertuuttoq, qujanaq