Avannaata Qimussersua

Pissaaneqarniunnermi Avannaata Qimussersua nuunneqarpoq

Qasigiannguani qimussertartut peqatigiiffiat QQP sioorasaarneqartutut misigimmat siulersuisuni ilaasortat ilaat tunuarsimapput

Avannaata Qimussersuaqarnissaanut qasigiarmiut piareersarluarsimagaluartut, QQP nalunaarpoq

Qasigiarmiut ugguaatigaat Avannaata Qimussersua Ilulissanut nuunneqarmat. Maanna aaqqissuisussaagaluartut QQP nalunaarput inuk aalajangersimasoq siulersuisunut ilanngunneqanngippat taarsiiffigitinnissamik piumasaqarfigineqarsinnaallutik.

Atuaruk: Avannaata Qimussersua Ilulissanut nuuppaat

Kalaallit Nunaanni Qimussertartut kattuffiat KNQK ataasinngornermi nalunaarpoq sukkaniunnissarsuaq Ilulissanut nuunneqartoq QQP-mi siulersuisut suliassaq naammassisinnaajunnaarmassuk. QQP-mi siulersuisut tamarmiujunnaarsimapput. QQP-milu siulersuisut nassuiaapput siulersuisuni ilaasortat ilaat tunuarsimasut sioorasaarisoqarnera pissutigalugu.

- Siulersuisut tunuartitsertut pissutigaat KNQK-mi ulluinnarni siulersuisunut ilaasortap ilaasa peqatigiiffiup siulittaasua telefonikkut saaffigalugu siorasaarsimammagu peqatigiiffimmut ilaasortanngortinneqanngikkuni peqatigiiffimmut allaat aningaasanik 60.000 koruuninik taarsiiffigitinnissaminut naleqariataannaasoq, QQP-mi allatsi Gaba Rosbach tusagassiutinut nalunaaruteqarluni allappoq.

Ilanngullugu oqaatigaa pisumi QQP nuna tamakkerlugu kattuffimmit KNQK-mi taperserneqanngitsutut misigisoq KNQK pisumut illuatungiliuttutut inissittoq nalileramikku.

Qasigiarmiut qilanaarsimagaluarput Avannaata Qimussersuaqarnissaanut taannalu maanna Ilulissani martsip 29-at pisussanngorpoq.

- Nunaqqatitta suliaq maannamut kusanartumik suliarereersimavaat – minnerunngitsumillu Qasigiannguit qimussimik sukkaniuffigissorsuummat, pinngortitallu kusanassusersua ilisimasaqaataammat qilanaarsimagaluarpugut, Gaba Rosbach nalunaarpoq.

Powered by Labrador CMS