Aalisarneq
Pisortaq: - Kineserinik sulisussarsiorani pinngitsoornani tulaassisarnisarneq atorunnaaginnarli
Pinngitsoornani tulaassisussaatitaaneq aalisarnermut akisusoq Frans Heilmann Siggu A/S-imi pisortaq isumaqarpoq
Aalisakkerivinni sulisussaaleqisoqartillugu pinngitsoornani tulaassisussaatitaaneq attanneqaannarnera eqqumiilluinnartoq, Siggu A/S-imi pisortaq Frans Heilmann isumaqarpoq.
- Tunitsivinni sulisussaaleqisoqarnera pissutaalluni avataanit tikisitanik sulisoqarniartarneq ukiuni arfinilinni kingullerni tusartareerparput, tusagassiuutinut nalunaarummi ilaatigut allappoq.
Usingiaaniat utaqqisariaqartarput
Aalisarnerup ingerlalluarnerulernera pisassiissutillu qaffanneqarneri taassuma aamma tikkuarpaa. Tamassumami kinguneraa tunisat amerleriaateqarnerisigut tunitsiviit angummanniapiluulersimaneri.
- Avataani aalisartuusugut maluginiarparput ukiuni arlalinni suliffeqarfiit kiffartuussisugut ajornartorsiuteqarlersimasut, Frans Heilmann allappoq.
Tamannalu kilisaatiutilinnut akisuvoq.
- Usingiaaneq unitsinneqartariaqartarpoq taamaasilluni ulluni arlalinni usingiartariaqartarluta. Ilaatigullu illoqarfimmut allamut usingiarnerput nangittariaqartarsimavarput usingiaasussaqannginnera pissutigalugu.
Tikisitanut suliassaqartitsinermut politikki
Pinngitsoornani tulaassisarnissaq politikkerit suliffissaqartitsinissamut aqqutissaanerarlugu taakkartuisarnerat Frans Heilmannip aamma eqqaavaa. Tunitsiviit sulisussaaleqiuartillugit tamanna nunaqavissunut suliffissaqartitsiniarnermut aqqutissaasorinngilaa.
- Taamaammat aperisariaqarpugut kinerserit suliassaqaannarniassammata pinngitsoornani tulaassisarnissaq attatiinnarneqassanersoq? Frans Heilmann apeqqusiivoq.