biilinut akitsuutit
Pisortaq: Akitsuusersueriaaseq paasiuminaatsoq tukattorlu
Biilit mingutsitsinerusut akisunerulissammata Naalakkersuisut motoorimut akitsuut allanngortinniarpaat. Kisianni kisitsineq taama ajornanngitsiginngitsoq Deres Automi kingunerisassanik naatsorsuinerit takutippaat. Biililerisut akitsuutit nutaat biilinik tuniniaasarneq unitsissagaat ersissutigaat
– Imminnut ataqatigiippallaanngillat. Tippinngorsimavoq saammarsaat kikkunnilluunniit paasineqarsinnaanngitsoq, Deres Automi pisortaq, Torben Nielsen, qamutinik motoorilinnik eqqussinermut ikummatissanullu akitsuutit nutaat qanittukkut tusarniaassutigineqaqqammersut aamma 2018-imi januaarip ullulisa allaqqaataaniit atuutilersussat pillugit, oqarpoq.
Sermitsiaq aviisi allappoq.
Akitsuusersueriaatsimimi biili mingutsitsinerujartortillugu akitsuusersuinerulertoqartussaavoq. Siunnersuut Naalakkersuisut pingasunngorlugu agguaqqammerpaat; eqqussinermut, ikummatissanut qamutinullu motoorilinnut akitsuutit.
Torben Nielsen nammineerluni aningaasaqarnermut akileraartarnermullu naalakkersuisoqarfimmiitilluni suleqatigiissitani akitsuutinik nutaanik suliarinneqataasimavoq. Taamaakkaluartoq kisitsisit tusarniaassummi takuneqarsinnaasut qanoq ilillutik oqallinnermit pissarsiarineqarsimanersut takujuminaatsippai.
– Suleqatigiissitami takorluukkat oqaluuseraavut. Akitsuut oqimaassutsimiit nukissiuutinik atuinermut nuutsinneqarnera isumassarsiatsialaasoq isumaqatigaara. Pisumili matumani akitsuutit nutaat equtitsipput. Ingammik biilit karsitut isikkullit akitsorujussuassapput, tuniniaavinnilu tamakkununnga assingusunik allanik periarfissaqarani, Torben Nielsen oqarpoq. Taanna biilit nuannarineqarnerpaat akitsuutaasa kingunerisassaannik naatsorsuisimavoq.
Kingunerisassanik naatsorsuinerit
Torben Nielsen naapertorlugu Mitsubishi Space Starip eqqunneqarnera 5 %-inik aamma motoorisa akitsuuserneqarnerat
24 %-iussasoq aalajangiunneqarput.
– Mitsubishi Space Star A-klassebiiliusoq eqqarsaatigigaanni tamanna naammaginanngilaq, avatangiisimmi eqqarsaatigalugit biilinit innaallagiatortunit, innaallagiatorlutillu benzinatortunit tulliullutik akisunerupput, Torben Nielsen, oqarpoq.
Eqqussinermut akitsuutit motorinulli akitsuutit nutaat takukkit allaaserisarlu tamakkerlugu Sermitsiami atuaruk, taanna uani pisiarisinnaavat: