suliffimmik taarsiineq
Pisortap Mittarfeqarfiit qimappai
Jens R. Lauridsen suliffimmi allami sulilerniarluni pisortatut taamaatippoq. Mittarfeqarfiit suliaani pingaarnerni annertuumik eqikkaasoqartussaavoq
Jens R. Lauridsen, 43-nik ukiulik, Air Greenlandip teknikkimut pisortatut atorfinitsippaa. Taanna Mittarfeqarfinni pisortatut ukiuni sisamani atorfeqarsimasuuvoq.
- Jens R. Lauridsenip teknikkimut pisortatut akisussaaffik tigussallugu kissaatigimmagu Air Greenlandip nuannaarutigaa, taassumalu allannguinermi aqutsinikkut aamma pisariillisaanermi aqutsinikkut nalinginnaasumik piginnaasaasa atorluarnissaat qilananaaralugu, timmisartortitseqatigiit tusagassiuutinut nalunaarummi allapput.
Suliffimmik allannguinissamut piffissatsialak
Tusagassiuutinut nalunaarummi Air Greenlandip nammineerluni erseqqissarpaa, timmisartortitseqatigiiffimmi piffissami aggersumi pisortaalluni mittarfeqarfinni pisortaanermit sooq nuannernerussanersoq.
Namminersorlutik Oqartussammi Kalaallit Airports A/S pilerseqqammerpaat.
Suliffeqarfik Namminersorlutik Oqartussat ataanni Nuummi Mittarfik, Ilulissani Mittarfik, Greenland International Airports Ltd, aamma Qaqortumi Mittarfik ataatsimut ingerlatseqatigiiffiussaaq.
Namminersorlutik Oqartussat Kalaallit Airports A/S-imik pilersitsisuupput, siunertamut allaatigineqarnera naapertorlugu Nuummi, Ilulissani aamma Qaqortumi mittarfiit sananeqarlutik, pigineqarlutik ingerlanneqassapput.
- Mittarfinnik nutaanik sanaartortoqarnissaanik pilersaaruteqarnerup kingunerisaanik Mittarfeqarfiit soorunami nutaanik unammilligassaqalerlutillu suliassaqalissapput, taamalu aamma tamanna tunngavigalugu Mittarfeqarfinni pisortap taarserneqarnissaanut piffissaq naleqqulluartuusinnaalluni, Air Greenland allappoq.
Namminersortunut utertoq
- Jens R. Luaridsen aallaqqaammut ingerlatsivimmi namminersortumiissimavoq, atorfillu pissanganartoq una aqqutigalugu ingerlatsivimmut namminersortumut uteqqinnissaminut periarfissaqalernermisut isigisimavaa, ukiuni sisamani pisortat ingerlatsivianni sulereerluni.
- Jensip taamanikkut atorfinitsinneqarami Mittarfeqarfinni nutarterinermik pisariillisaanermillu ingerlatsinissaq suliassaralugu aallartippoq, maannalu suliassani angusimallugu misigisimalluni, Mittarfeqarfiit ingerlanneqarnerannut ukiuni marlunni sinneqartooruteqartoqareersorlu, Air Greenland tusagassiuutinut nalunaarummini allappoq.