pisortanit ikiorsiissutit
Pisortanit ikiorsiissutini millionilikkaanik sipaaruteqarneq
2016-imi inuit pisortanit ikiorsiissutinik pisartut 2010-miilli aatsaat taama ikitsigilerput. 2015-imut sanilliullugu inuiaqatigiinnut tamanna 23 millionit koruuninik sipaaruteqartitsivoq.
Paasissutissat Naatrsorsueqqissaartarfimmeerput, taakku saqqummiunneqaqqammerput ''Utaqqiisaagallartumik isertitanut taarsiissutaasunik ikiorsiissutinik pisartut : 2010 - 2016''
Eqimattat marluk
Eqimattat marluk sammineqarput: suliffeqanngikkallarnermi ikiorsiissutit aamma ernereernermi ullormusiat il.il. Taaneqartumi kingullermi ukiup siulianut sanilliullugu 2016-imi ikiorsiissutinik pisartut amerlanerulaarput. Siorna 1.083-t ernereernermi ullormusianik il.il. pisartagaqarput, taakkulu ukiup siulianut sanilliullugit 58-nik amerlanerupput.
Naatsorsueqqissaartarfiup uani kisitsisit qanoq naatsorsorsimanerlugit nassuiarpaat:
- Kisitsisini paasissutissani ikiorsiissutinik pisartutut naatsorsorneqarpoq pineqartup kommunit naatsorsuuserivinni ukiumi naatsorsuiffiusumi inuup normuani ikiorsiissutip tunniunneqartup annertussusaa takuneqarsinnaappat. Pisortanit ikiorsiissutinik pisartunut killiliinermi piumasaqaataavoq ukiup ingerlanerani 500 kr.-inik qummullu ikiorserneqarsimanissaq. Suliffeqanngikkallarnermi ikiorsiissutinut aammalu ernereernermi ullormusianut il.il. 1000 kr. qummut killigitinneqarpoq, nalunaarusiami tamanna oqaatigineqarpoq.
18-it 29-llu akornanni ukiullit amerlanerusut
Ingammik 18-29-llu akornanni ukiullit pisortanit ikiorsiissutinik pisarput. Taakku ukioqatigiiaat pisartagaqartut 36 procenteraat. Taakkununnga tulliupput 50-it 64-llu akornanni ukiullit - pisortanik artorsartitsipput, pisartagaqartut 25 procentianniillutik.
Pisortanit ikiorsiissutit kommuninut agguataarneqarnerat qiviaraanni, 2010-mi aningaasartuutaannut sanilliukkaanni, Qaasuitsup Kommunia 5,5 millionit koruuninik siorna sipaagaqarsimavoq. Illoqarfiit annersaata kommuniani 2014-imut aningaasartuutigineqartunut sanilliukkaanni, siorna 25 millionit koruunit sipaarneqarput.
Uku pisortanit pisartagaqarsinnaapput
- Suliffeqanngikkallarnermi ikiorsiisarneq pisarpoq suliffissaaleqinermi, napparsimanermi ajutoornermiluunniit isertitaqarunnaarnermi. Suliffeqanngikkallarnermi ikiorsiissutit siunertaraat angerlartitaasimasutut allattorsimasut, suliffeqanngitsut sulisinnaatitaasut aammalu napparsimasut nammineq pisuussutiginngisamik suliffeqannginnermi, angerlartitaanermi napparsimanermilu isertitaqarunnaarsimasut aningaasaqarnikkut ikiorserneqarsinnaanissaat, inatsimmi tunngaviusumi tamanna allaqqavoq, tassani piumasaqaatit arlallit naammassineqaqqaartussaapput.