Pisortani qaffasissumik atorfillit ukiut tallimat qaangiuppata 60-70 %-ii marlunnik oqaaseqartuunissaannik piumasaqaat

Pisortat suliffeqarfiutaanni kalaallisut oqaaseqartut ukiut tallimat ingerlanerinnaani amerlingaatsiassapput.

Tamanna Inuussutissarsiornermut Aatsitassanullu Ataatsimiititaliap innersuussaqarnerata kingorna Inatsisartuni ilaasortat amerlanerussuteqartut aalajangerpaat.

Ukiuni quliniit tallimanut

Aalajangiineq Peter Olsenip (IA) siunnersuutigisimasaanit malunnaatilimmik sukateriffigineqarsimavoq, tassami Namminersorlutik Oqartussani Namminersorlutillu oqartussat suliffeqarfiutaanni qaffasissumik atorfillit 60-70 %-iisa kalaallisut oqaaseqartuunissaat ukiuni qulini anguniarneqartussaasimangaluarmat. Masskkummi ukiut tallimat ingerlanerini tamanna anguniarneqartussanngorpoq.

Qaffasissumik atorfillit oqaatsinik marlunnik atuisut kisitsisaatigineqanngitsut

Pisortat suliffeqarfiutaanni qaffasissumik atorfillit qassit oqaatsinik marlunnik atuisuunersut kisitsisaatigineqanngillat. Taamaammat oqaatigiuminaappoq anguniakkamit qanoq inissisimasoqarnersoq.

Tamannalu suli ungasittoq kisitsisini takuneqarsinnaavoq. Nunaqavissummi qaffasissumik ilinniagallit atorfimmik qaffasissumiinngikkaluarlutik sulisorineqartut qanoq amerlatigineri naatsorneqarsimapput.

Qaffasissumik ilinniagallit amerlanerit

Namminersorlutik Oqartussani sulisorineqartut 2008-mi 39 %-usimasut 2014-mi 47 %-nut qaffariaateqarsimapput. Namminersorlutik Oqartussallu suliffeqarfiutaanni sulisorineqartut 43 %-niit 49 %-nut qaffariaateqarsimapput.

- Qaffasissumik ilinniarsimasut nunatsinni inunngorsimasut amerliartortut nassuiaammit tigulaakkanit takuneqarsinnaavoq, taamaalillunilu siunissami pisortanngorsinnaasut – tamanna kissaatigigunikku - nunatsinni inunngorsimasut najugaqartullu amerlanerit pisortatut atorfininnissamut tunngavissinneqarnissaannik Naalakkersuisut anguniagaannut ilanngussinnaasut amerliartorput. Suliffeqarnermi ineriartortitsinerit ullumikkut ingerlanneqareersut siuarsarneqarnissaat siunertaralugu periusissiorsinnaaneq paasissutissatigut siuliani taaneqartukkut soorunami annikillisarneqanngilaq, Inuussutissarsiornermut Aatsitassanullu Ataatsimiititaliap isumaliuutissiissutaani allaasimasoqarpoq.

Sammivik nutaaq

Massakkut Naalakkersuisut siunnersuummut tapersersuipput, tamanna Naalakkersuisoqatigiit taarserneranni allannguutaasimavoq.

Siumukkummi Demokraatinik Atassutikkunnillu Naalakkersuisoqaterallarmat, siunnersuut ukiaanerani ataatsimiinnermi saqqummiunneqaqqaarsimavoq.

Taamani Naalakkersuisut siunnersuummut itigartitsisimapput, 'ineriartornerup pinissaa aalajangersimasunik ukiulersorneqarsinnaanngitsoq.' nalilersuinerminni oqaaseqaatigalugu. Taamani siunnersuummi ukiunit qulini anguniangaanera oqaaseqaammi malunginiagassaavoq.

Taamaattoq ukiut tallimat iluanni tamanna anguneqarsinnaanera aqutsinik pikkorissartitsiniikkut, sulisussarsiortarnikkut oqaatsinillu pikkorissartitsinikkut pisinnaasoq Naalakkersuisut isumaqarput.

Siunnersuut 22-nit taperserneqarluni akuerineqarpoq, Demokraatiniillu siunnersuummut itigartitsillutik marluk taasipput.