peqquserlunneq

Pisortaanerusimasumik Binzerimik isumaqatigiissut Tele-Postip atorunnaarsippaa

Tele-Postip siulersuisui sapaatiummat aalajangiipput pisortaanerusimasumik Michael Binzerimik isumaqatigiissut atorunnaarsinniarlugu. Taamaasilluni soraarnerminut atatillugu suliunnaavinnissap tungaanut akissarsiat qaammatit kingulliit qulit missaanni atugassani pinngitsuussavai

Assi toqqorsivimmit: Michael Binzer

Pisortaanerusimasup Michael Binzerip ilinniagaqannginnerminut tunngatillugu paasissutissiinera tunngavigalugu Tele-Postimi siulersuisut aalajangerput pisortaanertut isumaqatigiissutaasoq atorunnaarsinniarlugu.

Taamatut Tele-Post sapaatiummat unnukkut tusagassiorfinnut nalunaarutikkut paasissutissiivoq.

TELE-POST-imut siulersuisut sapaatiummat immikkut ittumik ataatsimiipput ataasiinnarmik oqaluuserisassaqarlutik, tassalu pisortaanerusimasup Michael Binzerip atorfinitsitaanermini ilinniaqqissimanernik marlunnik naammassinnissimasutut eqqunngitsumik nalunaarutiginnissimanerminik nassuerneranut tunngatillugu, ingerlatseqatigiiffiup qanoq iliornissaa.

Siulersuisut pakatsipput

– Tele-Postimi siulersuisut pakatsisimapput, pisimasoq tamanna pinngitsoorusussimagaluarlugu, siulersuisunut siulittaasoq Agner N. Mark nalunaarpoq.

–Ilinniarsimasamik eqqunngitsumik paasissutissiinerit tunngavigalugit atorfimmut ikkunneqarsimaneq taamatut ittoq, Namminersorlutik Oqartussat suliffeqarfiutigisaattut soorunami qisuariarfigisariaqarparput. Inatsisinut tunngasunik siunnersortigut tamanna pillugu oqaloqatigaagut, siulersuisullu isumaqatigiissut aalajangerput Michael Binzerimik isumaqatigiissuteqarneq ingerlaannartumik atorunnaarsinneqassasoq. Taamaammat suliunnaavinnissap tungaanut qaammatini sinneruttumi qulini akissarsiaqartitaaneq il.il. atorunnaarput, siulersuisut siulittaasuat nassuiaavoq.

Unneqqaserlunnerujussuaq

Michael Binzer TELE-POST-imi pisortaanertut atorfeqarpoq april 2013-imiit 2014-imi septemberip aallartisimalernerani nammineq suliffimminit soraarnermi tungaanut.


12. november 2014 Michael Binzeri TELE-POST-imit qinnuigineqarpoq ilinniarsimaneranut paasissutissat atorfinitsisnneqarsimaneranut tunngaviusimasut uppernarsaaseqqullugit, sapaatillu ataatsip qaangiunnerani Michael Binzerip nassuerutigaa, ilinniarsimanerit taaneqartut naammassisimanagit.

– Pisimasoq TELE POST-imi sulisunut tamanut unneqqaserlunneruvoq annertooq, aammalu unneqqaserlunnerulluni ingerlatseqatigiiffiup sullitaanut, piginnittuinut siulersuisuinullu - aap, kalaallinut inuiaqatigiinnut tamanut. Suliaq manna, suliallu ingerlasimanera pissutigalugit, maanna misissueqqissaassaagut, siunissami taamatut pisoqaqqinnginnissaa qulakkeerinniffiginiarlugu, siulersuisunut siulittaasoq Agner N. Mark oqarpoq.

Michael Binzer Air Greenlandimi pisortaanerusimavoq Tele-Postimi pisortaanertut atorfinitsitaannginnermini.

Powered by Labrador CMS