Naatsorsueqqissaartarfik
Pisissutigineqarsinnaasut qaffaallalaartut - uani isertitakkaajupput
Naatsorsueqqissaartarfimmit kisitsisit nutaat takutippaat nunap inuisa nunaqavissut isertitaat 2 procentimik 2013-imi qaffariarsimasut
Innuttaasut 2013-imi pissutissaqarnerulaarsimapput.
Tamanna Naatsorsueqqissaartarfiup ‘2013-mi isertitat’-imi kisitsisaataani nutaani takuneqarsinnaavoq. Tassani aamma erserpoq nunap inui nunaqavissut 14-it sinnerlugit utoqqaassusillit isertitaat tamakkerlugit, akileraarut akilertinnagu, agguaqatigiisillugu 217.000 koruuniusimasut. Tassa agguaqatigiissillugu ukiup siulianut sanilliullugu isertitat 2,0 procentimik qaffariarsimapput.
Tamannalu Naatsorsueqqissaartarfik malillugu akit qaffannerinut naleqqiullugu isertitat naleqassusaat 0,8 procentimik qaffappoq, tassa innuttaasut 2013-mi pisisinnaassusiat annertusiallassimalluni.
Nuummiut Saqqarmiullu isertitaqarnersaasut
Illoqarfimmiuni ukiumut agguaqatigiisillugu Nuummiut tupaallaataanngitsumik isertitaqarnersaapput. Tassami Nuummioq agguaqatigiisillugu ukioq 2013-imi 294.000 koruuninik isertitaqarsimasoq, Sisimiuni Ilulissanilu innuttaasut agguaqatigiisillugu 223.000 aamma 205.000 kroner 2013-imi isertitaqarsimapput.
Nunaqarfimmiut illoqarfimmiunut sanilliullugu isertitaat appasinnerupput. Nuna tamakkerlugu agguaqatigiisillugu illoqarfimmiut 226.000 koruuninik isertitaqartut, nunaqarfimmiut agguaqatigiisillugu 152.000 koruuninik isertitaqarsimapput.
Taamaalilluni nunaqarfittut inissisimasuni mittarfeqarfiusuni, Kangerlussuarmi aamma Narsarsuarmi najugallit ukiumut 302.000 aamma 291.000 koruuninik 2013-imi isertitaqarsimapput, uffali Ilulissat eqqaani Saqqarmiut agguaqatigiisillugu 2013-imi 197.000 koruuninik isertitaqarsimasut.
Kisianni Qaanaap nunaqarfiani Qeqertani innuttaasut nuna tamaat isigalugu agguaqatigiisillugu isertitakinnersaapput. Taakkumi 2013-imi agguaqatigiisillugu taamaallaat 83.000 koruuninik isertitaqarsimapput.