Nuuk
Pisinnaasat pillugit allagartartaarsinnaaneq ajornannginnerusoq
Kommuneqarfik Sermersuup nunani tamalaani iliuuserineqartartoq atulerpaa
Kommuneqarfik Sermersuumi inuusuttut meeqqat atuarfiannit soraarummeersimanngitsut imaluunniit ilinniagaqarsimanermut allagartaqanngitsut, ilinniartitseriaaseq Open College Network (OCN) atorlugu maanna allagartartaarsinnaanngussapput, kommuni ilisimatitsivoq.
Atuaruk: Inuusuttut amerlanerusut ilinniarsimanatillu suliffeqanngillat
OCN tassaavoq, inuit ilinniagaqarsimanngitsut ulluinnarni misilittagaqarneri tunuliaqutigalugit ingerlaqqinnissaannut periarfissillugit allagartartaartinneqartarfiat naalagaaffinnillu tamanit akuerisaasoq.
Periarfissat nutaat
Kommunimi innuttaasut soraarummeersimanermut allagartaqanngitsut taamatullu ilinniagaqarsimanermut allagartaqanngitsut naammaginartumik ikiorserneqartarnissaannik periarfissinneqartarnissaat ulloq manna tikillugu eqqumaffigineqarneri killeqarsimavoq.
OCN-imi siunnersortissat 15-nit 20-llu akornanni amerlassuseqartut Nuummi ukiap ingerlanerani ilinniartinneqalissapput. Taakkulu Kommuneqarfik Sermersuumi tamani susassaqarfinnit ukunannganeersuussallutik: Innarluutilinnut Tarnikkullu nappaatilinnut immikkoortortaqarfimmit, Piorsaavimmit, Piareersarfimmit taamatullu Suliffeqarnermut immikkoortortaqafimmit.