internetti
Pisiniarfiup ittua isumatsaqalluni Tele-Post tupigusuutingaa
Pisiniarfiup ittua Otto Martinsen ataasinngornerup ullaatungaaniillu internettimut attaveqarsimanngilaq, tamannalu tuusintilikkuutaanik annaasaqaatigaa. Tele-Postilu ikiuerusunngilaq.
- Tele-Postimi sullissineq ajorluinnarpoq, Nuummi Panasonic Centerimi pisiniarfiup pisortaa Otto Martinsen erseqqissaavoq.
Modemi nutaaq iluaqutaanngitsoq
Ataasinngormat ullaakkut pisiniarfik ammaramiuk pisiniarfiup internettimut attaveqaatai atorsinnaasimanngillat, Tele-Postimullu attaveqarpoq. Tassani paasitinneqarpoq modemi qanganitserpallaarsimanerata pissutigingunagaanik nutaamik pisaartariaqartoq.
Modemilu nutaaq ikkussorneqarpoq, ajornartorsiulli suli iluarsineqarani. Arlalippassuarnillu saaffiginnissuteqartarsimangaluartoq, suliaq suli uninngatinneqarpoq.
- Saaffiginnitsillunga paasitinneqartuaannarpunga, "suliaq massakkut ingerlanneqarmat" oqaaseqarfigineqarsinnaanngitsoq, Otto Martinsen oqarpoq.
Dankortimik akiliisoqarsinnaanngitsoq
Internettimut attaveqarnissaq pisiniarfiup ittuanut pingaaruteqarluinnartuuvoq, dankortterminalimmi internettimut attavilersungaapput.
- Pisisartuutikka aningaasanik tigummiaqarpiarneq ajorput, taamaammat ataasinngornermiillu amerlasuut pisiaraqaratillu pisiniarfik qimattariaqartarsimavaat allamullu pisiniartarlutik. Aningaasarpassuit annaasaqaatigaakka, kisermaassillunilu ingerlatsivimmi kiffartuussineq pitsaassusaa tupigusuutigaara, Otto Martinsen naqissusiivoq.
Tele-Postip piffissap qanoq sivisutigisup ingerlareerpat aatsaat ikiuutissanersoq ilisimanagu isumatsannartorujussuuvoq.
- Kaaviaartitassaangaluillu annaasaqarfigineri kimit akilerneqassanersut, Tele-Postimut aamma apeqqutigisimavaa. Akissuteqarfigineqaranilu.
Sullitanut pisortamit tupaallaatigineqartoq
Sermitsiaq.AG-p Tele-Postimi sullissisut pisortaat Brian Semdemark attaveqarfigisimavaa, taassumalu suliaq eqqumiigivaa.
- Internetti nuna tamakkerlugu kipisaqattaarnera misigisimavarput. Ullunilu arlalinni ajornartorsiutaasimanera tupaallaatigaara, Brian Smedemark oqarpoq.
Brian Smedemark paasissutissiivoq, suliffeqarfiit sullinneqartut toqqaannartumik kiffartuussivimmut sianersinnaasut, taamaattoq pisiniarfiup ittuata qanoq inissisimanera paasisinnaalluaramiuk, suliaq nammineq malinnaaffiginialerpaa.
- Oqarasuaatimma normua Otto Martinsenimut tunniutikuttoorsinnaavat, taamaasilluta ajornartorsiut iluarsiniassavarput, sullitanut pisortaq Sermitsiaq.AG-mut oqarpoq.
Pissusissamisuunngitsoq
Sullitanut pisortap suliaq malinnaaffigaluguli aaqqiissuteqarnialernera, Otto Martinsenip nuannaarutigaa.
"Tusagassiuutilli akuliutsinneqarnissaat pissusissamisoorpa", pisiniarfiup ittua aperivoq.