Nuuk
Pisiniarfimmi ujajaanermi pisiniartitsisut savimmik ikilerneqartut
Arfininngormat unnukkut Nuummi Brugseneeraq ujajaaffigineqarpoq. Angut tigusarineqarpoq
Arfininngormat juunip 18-ianni nalunaaqutaq 21.45 missaani Nuup illoqarfiata qeqqani Brugseneeraq ujajaaffigineqarpoq.
Ujajaasup karsimit 2.000 koruunit missaanniittut tiguvai, pisiniartitsisullu marluk ujajaasumik unitsitsiniaraluartut ujajaasup saveeqqamik aappaa assaatigut aappaalu niuatigut ikilerpai.
Inuunerminnik ulorianartorsiunngillat
Politiit naapertorlugit ujajaanermi pisiniartitsisut ikilerneqartut inuunerminnik ulorianartorsiunngillat, kingornalu ikilerneri napparsimmavimmi passunneqarput.
Tigusarineqarpoq
Politiit paasiniaanermikkut angut 20-ikkut qeqqanni ukiulik arfininngornerup unnuaani Nuummi tigusaraat. Taanna ulluni 25-ni tigummineqarallartussanngortinneqarpoq.
Angut ujajaaneq pillugu pinerluttulerinermi inatsimmi paragraf 112, imm.1, nr. 2 naapertorlugu unnerluutigineqarpoq.
Pisimasup paasiniaqqinnissaa pissutigalugu politiit maannangaaq annertunerusumik paasissutissiisinnaanngillat.