timersorneq
Pisiffiup timersorneq tapersersorpaa
Pisiffiup Kalaallit Nunaanni Timersoqatigiit Kattuffianni pingaarnerusutut aningaasaliisutut nutaatut samminiarpaa amerlanerit timersornissamik periarfissaqarnissaat kiisalu kajumissutsiminnik sulisut, peqqissuseq qinngasaarisarnerlu
Pisiffik A/S-ip aamma Kalaallit Nunaanni Timersoqatigiit Kattuffiata isumaqatigiissutigaat Pisiffik 2015-imi januaarip aallaqqaataanit GIF-imut nutaamik pingaarnerusutut aningaasaliisunngussasoq. Tamanna GIF-ip tusagassiorfinnut nalunaarutikkut nalunaarutigaa.
Isumaqatigiissut atsiorneqarpoq Kalaallit Nunaanni Timersoqatigiit Kattuffianni siulittaasumit Nuka Kleemannimit, Pisiffik A/S-imilu pisiortornermut ussassaarinermullu pisortamit Niels Andersenimit.
Tusagassiorfinnut nalunaarummi allassimavoq illu'atungeriit naatsorsuutigigaat ataatsimoorlutik Kalaallit Nunaanni tamarmi timersornermi atugassarisat ingerlanneqartartullu siuarsarsinnaallugit sumiiffinnilu timersortartunut, peqatfigiiffinnut kiisalu kajumissutsiinnik sulisunut, iluaqutaasinnaallutik.
Ullumikkut amerlasuut timersortartooreerput, aningaasaliinikkulli annertunerusumik siunertarineqarpoq kikkut tamarmik timersorsinnaassasut, taamaattumillu suli amerlanerit timersorumalissasut timersornermillu aallussinissaminnik periarfissaqalissasut, ilaatigut pingaarutillit pingasut, tassa kajumissutsimik sulineq, peqqissuseq kiisalu qinngasaarisarneq, samminerulernerisigut.
Timersorneq peqqinnartuuvoq, inunnik peqateqartitsisarluni piginnaasaqalersitsillunilu, taamaattumillu timersorneq pitsaanerpaanik periarfissaqassaaq innuttaasunut amerlanerpaanut anngutsinniarlugu, tusagassiorfinnut nalunaarummi allassimavoq.
Meeqqat, inuusuttut inersimasullu timersornissamut periarfissaqassapput, avatangiisini peqqinnartuni nuannersunilu, tamakkunanilu iluaqutissat iluaqutisiginnaassallugit, Pisiffiullu aningaasaliinermigut Kalaallit Nunaanni timersornerit suulluunniit tapersersorusuppai.
Pisiffik pisiniarfiummini Timersorneq assigiinngitsutigut saqqumilaalersinniarpaa, minnerunngitsumik timersornermi kajumissutsiminnik sulisut, pingaaruteqaqisut, sammilersinnerisigut, tusagassiorfinnut nalunaarummi allassimavoq.
Aningaasaliineq naleqarpoq saqqummilersitsinikkut, Kalaallit Nunaanni Timersoqatigiit Kattuffiannut ilaasortaanullu akikilliliinikkut kiisalu timersortartunut aningaasanik amerlanerusunik tunisinikkut.
Kalaallit Nunaanni Timersoqatigiit Kattuffiata neriorsuutigaa Pisiffiup aningaasaliissutaa nunamut tamarmut iluaqutaassasoq.
Pisiffiup Kalaallit Nunaanni Timersoqatigiit Kattuffiannik Kalaallit Nunaanni timersornermik suleqatigilernissaa qilanaaraa, ilanngullugulu tulluusimaarutigalugu Arctic Winter Games 2016-imi timersortartut atisalersortussaagamigit.