atugassanik pisiniarfik
Pisiffik milliardi koruuninik kaaviiaartitaqarlerpoq
Niuertarfiuteqarfiup kaaviiaartitani aamma ingerlatsinermut sinneqartoorutini annertusivai
1,005 milliardit koruunit.
Pisiffik 2015-imi taama annertutigisumik kaaviiaartitaqarpoq, ingerlatsivik taama ilisimatitsivoq.
Kaaviiaartitat taamaalillutik 2014-imut sanilliullugu procentinik tallimanik annertusipput. Suliffeqarfillu saniatigut, kaaviiaartitanut tunngatillugu pingaartumik angusaqarpoq.
Pisiffiup tamatuma saniatigut ingerlatsinermut sinneqartoorutini annertusivaa. EBITDA-angusanik taaguuteqartut procentink arfineq-marlunnik qaffariarput 62,8 millionit koruuninngorlutik.
Atuaruk: Pisiffik sinneqartooruteqarujussuartoq
- Pisiffiup 2015-mi suliffeqarfiup immikkoortortaqarfii pingaarnerit nukittorsarsimavai, ussassaarinikkut aammalu akinik ukkataqarnikkut Pisiffiup tuniniaanermi inissisimanini nunatsinni tigumiinnarpaa, aammalu oqaluttuarisaanermi aningaasatigut anguniartuakkani angusimallugu, tassa suliffeqarfiup kaaviaartitamini angummagit aningaasat milliardit, ingerlatsivik tusagassiuutinut nalunaarummi erseqqissaavoq.
NotaBene pisiarigaa
2015-imi ukiakkut Pisiffiup kalaallit nunaanni elektronikkikkut inissisimanini nukittorsarpaa elektronikkeerniarfiup Nota Bene-p pisiarineratigut Nuummi, tassanilu aamma ilaavoq webshop. Aammattaaq Pisiffiup Elgiganten Ilulissani ammarpaa.
Atuaruk: Elektronikkinik tuniniaasartoq Pisiffimmit pisiarineqarpoq
BonusiClub
Pisiffiup BonusiClub ingerlannerani atuisunut apuulluarpoq. 2015-ip naanerani ilaasortat 28.194-nit angusimavai, taakkunani ilaasortassatut siunniunneqarsimasut 95 procentit angusimallugit.
Ukioq 2015-mi Pisiffiup 11 millionit koruunit ataatilaarlugit ilaasortaminut akikillisaatitut tunniussimagai, suliffeqarfik ilisimartitsivoq.
KK Engros
Ukioq 2015-ip naanerani Pisiffiup KK Engrosimi aktiet sinneri pisiarai, maannalu tamakkiisumik Pisiffik A/S-imiit KK Engros pigineqarlerpoq.
2015-mi decembarip 31-ani Pisiffiup sulisorai inuit 628-it Pisiffik A/S suliffeqarfeqarpoq illoqarfinni ukunani: Qaqortoq, Nuuk, Maniitsoq, Sisimiut, Aasiaat aammalu Ilulissat, taakkunani pisiniarfiit 40-rut missaani ingerlanneqarlutik. Pisiniarfiillu makkuusut ingerlallugit: Pisiffik, SPAR, Torrak Fashion, Elgiganten/Pisattat, Nota Bene, Jysk kiisalu KK Engros.