Pisiffik Brugsenilu imigassamut inatsisissaq akerliuffigaat

Tallimanngorpat 3. november 2017 pisisartut imigassanik aalakoornartulinnik pisiniarunik taamaallaat pisisinnaapput immikkoortortaqarfimmi assiaqutilimmi.

Imigassanut aalakoornartulinnut inatsit nutaaq Inatsisartuniit akuerineqassappat siunissami taamak isikkoqalernissaa takutinniarlugu taamak isiortoqarniarpoq. Pisiffik aamma Brugseni tusagassiuutinut nalunaarummi allapput.

Taamaatinneqarnissaa neriuutigaat

- Ulloq 6. november inatsit nutaaq siunnersuutigineqarsimasoq Inatsisartuni aappassaaneerneqassaaq tassanilu neriuutigaarput inatsisip nutaap atuutilinnginnissaa. Neriuutigaarput nioqquteqarfiit, peqatigiiffiit aammalu pisortat akornanni oqaloqatigiinnikkut
aammalu suleqatigiinnikkut imigassamik aalakoornartulimmik atuineq annikillisarniarlugu suleqatigiisitaliortoqarumaartoq, taamak oqaaseqarput ussassaarinermi aammalu piniartarnermi pisortaaneq Heine Stilling Jensen Pisiffimmeersoq aammalu Tuniniaanermi Pisortaq Jes Nyborg Brugsenimeersoq.

Imigassanut aalakoornartulinnut inatsit nutaaq maannamut isikkoqarneratuut atortussanngortinneqarpat ulloq 1. Marts 2018 aallarnerfigalugu Kalaallit Nunaanni niuernermik tuniniaasut tamarmik pinngitsaalisamik pisiniarfitsik piumasarineqartut malillugit assiaqutiliornikkut allanngortitsertussanngussavaat, tamannalu namminneq akilissavaat.

Nutarsaanermut assiaqutsersuinermullu aningaasartuutit nioqqutissanik allanik akitsuinikkut akilerneqassasoq, Pisiffiup Brugsenillu mianersoqqussutigaat.

Går ud over andre varer

- Taakkununnga akiligassaq nioqqutinik allaniit akinik qaffaanikkut akilerneqassaaq. Taakku saniatigut sulisoqarnermi aningaasartuutit qaffassapput, tillinniartoqarsinnaanera pinngitsoortinniarlugu immikkoortortaqarfiit assiaqutillit ataavartumik inuttalerneqartariaqarmata, taamak oqarpoq Heine Stilling Jensen aamma Jes Nyborg.

Imigassamullu inatsip niuernermik ingerlaqartut inuusuttunik 18-nit inorlugit ukiulinnik sulerusuttunik, ilinniarnermi saniatigut sulerusuttunik ilinniartutulluunniit atorfinitsitsisinnaanerat kingunerlutsinneqarsinnaasoq, taakku isumaqarput.

- Inuusuttut taamak ukiullit akornanni suliffissaaleqilernerulernerannik kinguneqassaaq aammalu taamak ukiullit akornanni ilinniartut ikilissallutik. Taamak ukiullit suliffeqarsinnaanerat pingaaruteqarpoq, aaliangersimasumillu suliffeqarsinnaanerat taamalu
ilinniarnissaminnut kajumissaarneqarnissaat. Inuusuttorpassuit niuertarfiit suliffissatut misilittagaqarfiginiarlugit toqqartarpaat, taamalu siullermik suliffeqarfeqarfimmut misiliisarlutik, ukiualunnguillu qaangiukkaangata ilinniartunngorlutik aallartittarput, tusagassiuutinut nalunaarummi allassimasoqarpoq.

Pisiniarfimmiunngorniat inuussuttut eqqugaasinnaasut

Brugsenimi tuniniaanermut pisortap Sermitsiaq.AG-mut oqaatigaa imigassamut inatsit TNI Pisiniartitsisunngornianut amerlasuunut kingunerlutsitsisinnaavoq, imigassamummi inatsissaq naapertorlugu taakku 18-nileeqqaarsimatillutik imigassanik suliaqarlutillu tuniniaasinnaasinnaapput.

- Ilinniartuutivut ilinniarluartikkusuppagut, nioqqutissallu tamaasa suliarisinnaannaatinnagit taamaaliorsinnaanngillat. Ilinnialertussat 18-leereersimanissaat piumasaqaataalersinnaavoq, Brugsenimi tuniniaanermut pisortaq, Jes Nyborg, 16-nik ukiulinnik ilinniartuuteqarnertik erseqqissaassutigalugu, oqarpoq.

Meeqqat atuarfiani 10. klasse inaarutaasummik misilitsinnerup kingorna Niuernermik Ilinniarfimmi TNI Pisiniartitsisunngorniatut ilinnialertoqarsinnaavoq.

Politikerit oqaloqatigerusukkaat

- Assorsuaq politikerit oqaloqatigerusuppagut aammalu pinaveersaartitsiniarluni suliniutissanut peqataasinnaavugut, taamak naggasiipput Heine Stilling Jensen aamma Jes Nyborg.