Skip to main content

Pisassiissutit isumaqatigiissutigineqarsinnaanngorunartut

Partiit amerlanerussuteqartut pisassiissutit arlariinnit aalisarneqarsinnaalernissaat kissaatigaat. Qanorli piaartigisumik aamma qanoq agguarneqassanersut suli isumaqatigiinngissutaavoq.

Inuit Ataqatigiit siulittaasuata Sara Olsvigip aamma Siumup siulittaasuata Kim Kielsenip aalisarneq pillugu ippassaq tv-kkut toqqaannartumik oqallitsinneqarneranni ersernerlukkunaraluarpoq. Kisianni taakkua marluk raajartassat ilaasa utertinneqarnissaannut isumaat imminnut ungasipput.

Sara Olsvigip naqissuseqqippaa Inuit Ataqatigiit raajartassat utertinneqarnissaat ukiunik 15-nik siumut ilimasaaruteqarnikkut pisariaqartoq parteertik isumaqartoq.

Siumup ukiut tallimat qulilluunnit

Kimi Kielsenip utertitsinissamut siumut ilimasaaruteqarnissaq ukiunik tallimanik sivisussiseqartariaqartoq isummersimanertik naqissuseqqillugu oqaatigaa. Kisianni tamatuma kingorna nutaamik inatsiliornikkut ukiunut qulinut ilisaarinissaq pisariaqartoq oqaatigalugu, tamatumani aningaasaliissutaasimasunut  akiliinissamut periarfissiiniarlutik.

- Tassa taamaalilluni ingerlatitseqatigiiffiit ukiunik 15-nik periarfissinneqassapput, arlaleriarluni oqallinnermi taama naqissusiivoq.

Demokraatineersoq Niels Thomsen ukiunik qulinik siumut ilimasaaruteqartariaqartoq siunnersuuteqarpoq, partiillu piffissaliunneqarsinnaasoq taanna inooqataaffigisinnaallugu akuersaarpasipput. Taamaalilluni aalisagartagassat agguaanneqarnissaat isumaqatigiissutigineqakannersoq oqaatigineqarsinnaalerpoq.

Demokraatit akitsorserusserusupput

Apeqqutaalersorli alla assortuussutaanerulersoq malunnarpoq, tassa pisassiissutit utertinneqarpata qanoq agguaateqqinneqassanersut.

- Kikkut pisassiissutit taava pissavaat? Tamassuma akissuteqarfigineqarnissaa amigaatigaara, Suleqatigiissuneersoq Michael Rosing oqarpoq.

Apeqquteqaataanut ersarinnerpaamik Demokraatineersoq Niels Thomsen akissuteqarpoq. Taanna siunnersuuteqarpoq pisassiissutit akitsorterunneqassasut, soorlu savalimmiormiut taama iliorsimasut.

- Aaqqiissutaasinnaavoq inuiaqatigiit aningaasarsiffigisinnaasaat, aamma inuussutissarsiuteqartut naammagisimaarsinnaasat, Niels Thomsen oqarpoq.

Taamaalilluni politikkikkuunngitsoq niuerutigineqarneratigulli aaqqivigineqasssangaluartoq oqarluni.

- Politikerit ikinngutiminnut agguaanissaat pinaveersaartinneqassangaluarpoq, Niels Thomsen oqarpoq.

Inuit Ataqatigiilli isumaqataanngillat. Sara Olsvig nassuiaavoq partiip kissaatigigaa pisassat nammineq pigisat niuerutigineqarsinnaasariaqartut, taakkualu Naalakkersuisunit aqunneqassasut.

Nunatta Qitornai utertitsinissamut isumaqataanngillat

Pisassiissutit allatut agguarneqarnissaat eqqarsaatigalugu malunnarpoq partiit amerlanerussuteqartut isumaqatigiissutigigaat pisassat amerlanerusunut aggulunneqarnissaat. Naak, Aningaasaqarnermut Siunnersuisooqatigiit siulittaasuata Torben M. Andersenip taamaaliornikkut inuiaqatigiit iluanaaruteqarnissaat qularnarneraraluaraa.

Partiinilu eqqartorneqartumut akerliusutuaavoq Nunatta Qitornai. Siulittaasup Vittus Qujaukitsup naqissuserpaa partiip pisassiissutinik utertitsinissaq kissaatiginngikkaa.

- Tamanna ingerlatsiseqatigiiffinnut inuiaqatigiillu aningaasaqarneranni inissisimaffiannut ataqqinninnginneruvoq, Vittus Qujaukitsoq oqarpoq.

Taarsiulluguli partiip sinerissap avataani aalisarfiit annertuserusuppaat. Ilaatigut Nunatta Islandillu imartami ataatsimoorlutik aalisarfigisaanni pisassanik annerusunik piumasaqarnikkut.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER