Pisassat qaffaniarpaat

Qaleralinnik aqutsiviit allanngortinneqarnissaat siunniunneqarpoq. Kangaatsiap aamma Ilulissat immikkut aqutsivinngortinneqarnerisigut. Tamanna pippat aalisarnerup ilusaa allanngussaaq,.

Kangaatsiap eqqaata Qeqertarsuup Tunuata aqutsiveqarfianiikkunnaarsinnissaa siunnersuutigineqarpoq.

- Taamaalilluni Kangaatsiarmiut Kalaallit Nunaata sinneratulli pineqalissagaluarput, killeqanngitsumik aalisarsinnaanngorlugit, taamaalilluni Qeqertarsuup Tunuani pisassasanik killilersukkanik ”ilanngartuijunnaarlutik”, Aalisarnermut Naalakkersuisoq, Karl Lyberth Siumumeersoq oqarpoq.

Ilulissat Kangiata immikkut inissinneqarnissaa Naalakkersuisut aamma kissaatigaat.

- Tamanna pisinnaappat Ilulissat Kangiani pisarineqartartut, Qeqertarsuup Tunuani pisassiissutigineqartartunit 8.000 tonsinit ”ilanngartuutaajunnaassapput, Karl Lyberth,oqarpoq.

Qaleralittassat amerlinissaat aalisarnermi siunnersuisooqatigiinnit aamma aqagu isummerfigineqassasoq Karl Lyberth-ip oqaatigaa, oqaatigisinnaanngilaali qanoq amerlatigisunik pisassanik qaffaasoqarsinnaassanersoq.

Ukioq kaajallallugu aalisarneq
- Aqutsiveqarfinni Upernavimmi Uummannamilu Qeqertarsuullu tunuani, pisassat qaffalaannguarnissaannik kissatigisavut aalisarnermut siunnersuisooqatigiinniit malinneqassasut naatsorsuutigaarput, Karl Lyberth, oqarpoq.

- Kangaatsiap nunatta sinneratut killeqanngitsumik aalisarfiulersinnaaneratigut aamma Ilulissat Kangiata immikkut inissinneratigut, neriuutigaarput Qeqertarsuup Tunuani aalisartut ukioq kaajallakannerlugu aalisartut aalisarsinnaalissasut, Karl Lyberth oqarpoq.

Upernaviup aqutsiveqarfiata aamma Uummannap aqutsiveqarfiata marlunnut avinneqarsinnaanissaat Naalakkersuisunit maannakkut nalilersorneqarput.

- Upernaviup aqutsiveqarfiata isorartuup marlunnut avinneqarnissaa illersorneqarsinnaasoq Naalakkeruisut isumaqarput. Taamaaliornitsigut neriuutigaarput pisassat amerlineqalaarsinnaasut, Karl Lyberth oqarpoq.

- Naatsorsuutigilluinnarpara aqutsiveqarfimmi Upernavimmi pisassat ukioq naatinnagu amerlineqarsinnaassasut, Karl Lyberth oqarpoq.

Allannguutissatut siunnersuutit maanna tusarniaassutigineqalerput.