Anusinngorsaatit
Pisariaqanngitsumik ajorsarneq
Final Four-imi semifinalimi GOG ajugaanissaminut periarfissarissaaraluaqaluni ajorsarpoq
Klubbi angusarissaartarluarsimasoq GOG, 1990-imiilli siullermik pokal-innakkamili 14-inissaa pokalinnannissaminut arfininngormat periarfissarpassuaqaraluarpoq.
Århusimi unammisarfissuarmi NRGI Arena-mi unammivaa Bjerringbro-Silkeborg. Ajugaasup sapaammi ualikkut pokalfinalimi KIF Kolding København unammisussaavaa, tassa semifinalip aappaani KIF Kolding København-ip HC Midtjylland ajugaaffigimmagu.
Unamminermi GOG aallartilluaraluarpoq. Holdi piumassuseqarluarpoq. Assersuisut - målimi arsarluaqisup Kevin Møller-ip saavani - Bjerringbro-Silkeborg-imi unammillammaat soorlu Jannick Green, Mads Christensen, Casper U. Mortensen, Kasper Nielsen minnerunngitsumillu norskeq Kristian Kjelling assersorluarpaat. Saassussinermit siullermit Minik Dahl Høegh takutitsivoq, GOG-llu isertitaanit siullernit sisamanit marluk isertillugit. Neriulluarnartoqarpoq. GOG-mut ajoraluartumik Bjerringbro-Silkeborg-ip sungiusaasuata svenskip Per Carlén-ip målmandi taarserpaa. Serbiamiu Dane Sijan mål-imiilerpoq, unamminerlu allanngorpoq. GOG isertitsiuminaatsitsisupilussuanngorpoq.
Unamminerup immikkoortuani siullermi GOG 9-7-mik ajugaavoq, Dane Sijan-ili arsarluartorujussuanngorpoq. GOG minutsini 15-ini isertitsinngilaq. Isertissinnaalluinnakkat 13-it isertinngitsoorpaat. Taamaasilluni kakkannerit unammineranni ajugaasoqarneq ajorpoq. Naggataatigut GOG 18-21-mik ajorsarpoq.
Nammineq pisuuvugut
GOG-mi sungiusaasuunerup Jakob Larsenip unammisartullu nassuerutigaat ajorsarnerminnut nammineq pisuullutik.
– Assersuilluartorujussuuvugut. Saassussisarnerpulli kakkagisassaanngilaq. Periarfissat affaannaalluunniit isertissimasuugutsigit unammineq allatorluinnaq inerneqassagaluarpoq. Nassuerutigiinnarniartigu unammisartuvut inuusuttut suli ilinniagassaqaqisut, taamaattussaagunaramimi, Jakob Larsen ugguartoq unamminerup kingorna Sermitsiaq.AG-mut oqarpoq nangillunilu:
– Aamma anisitaanivut amerlavallaaqaat. Tallimariarluta anisitaasoqarpugut Bjerringbro-Silkeborg marloriarluni anisitaasoqartoq, minutsillu qulit ikinnerusarnerput akisuvoq.
Minik Dahl Høegh pingasunik isertitsivoq
Minik Dahl Høegh aallartilluaqisoq pingasunik isertitsivoq. Akutaaneq Kreutzmann isertitseriartuaqattaartuaraluarpoq iluatsitserpiassananili.
– Qitigissinerusimagaluarlunga kiropraktor-imiissimagaluarlungalu Mexicomi Cuba-mut unamminermi siullermi ajoqusernera suli malugisinnaavara. Kissassimaartuartariaqarpunga, taamaanngippat unammisinnaannginnama, Akutaaneq Kreutzmann unamminerup kingorna Sermitsiaq.AG-mut oqaluttuarpoq.
Kalaallit Nunaat tusagassiorfinni
Minik Dahl Høegh, Akutaaneq Kreutzmann minnerunngitsumillu Jakob Larsen fynimi tusagassiorfinni aalajangersimasumik sammineqartarput. Ilaatigut Fyens Stiftstidende-mi assitigut angisuutigut, oqaluttuatigut apersuinikkullu Kalaallit Nunaat nittarsaanneqartuartarpoq.