Pisanik sukkasuumik assartuineq

Aalisartut, Ilulissat Kangerluanni sikukkut qaleralinniartut, ukiut aappassaa tulleriisiinnarlugu akuerineqarput pisatik snescooterimik Ilulissani Royal Greenlandip suliffissuanut assartorsinnaagaat. Taamatut Royal Greenland.gl paasissutissiivoq.

Suliffinnik pilersitsisoq

Sikup sinaanit pisanik nunakkut snescooterimik suliffissuarmut assartuinikkut, aalisartut qaleralinnik amerlanerujussuarnik tunisaqarsinnaapput. Tunisallu amerlanerusut Royal Greenlandip Ilulissani aalisakkanik suliffissuani ataavartumik suliassaqartitsissapput.

Uummaarissumik aalisarneq

– Aalisartut pisaannik sikup sinaanit sikukkut snescooterimik assartuinikkut aalisartut sivisunerusumik sikumi aalisarfimminniissinnaapput. Sapaatip akunnera ataaseq angullugu illuaqqani unnuisarsinnaapput, taamaattumillu amerlanerujussuarnik qaleralinniarsinnaallutik. Tamannalu Royal Greenlandip aalisakkanik suliffissuani ukioq kaajallallugu ataavartumik suliassaqartitsisinnaavoq, Royal Greenlandimi aalisarnermut siunnersorti Therkel Mathiassen oqarpoq.

Iluatsilluartoq

Taamatuttaaq aaqqissuussisoqarsimavoq 2014-imi.

– Tamanna iluatsilluarsimavoq, tassa aalisartut 20-niit 30-nut amerlassusillit siorna sikukkut aalisarnikkut qaleralinnik 100 tonsinik tunisimmata. 70 kilometerinik isorartussusilimmik qimussimik siumut utimullu ingerlaartassagunik nalinginnaasumik 30 tonsit missaannaannik tunisaqarsinnaammata, snescooterimik assartuinikkut aalisartut amerlanerujussuarnik aningaasarsiorsinnaapput, Therkel Mathiassen oqarpoq.

Assartuineq

Aalisartut Ilulissat Kangerluanni sikumi, Ilulissanit 70 kilometerit missaannik ilorpasitsigisumi aalisartarput. Tamatuma kingorna pisatik 5 - 20 kilometerinik ungasissusilimmut nunamukaattarpaat, pisaallu karsinut 250 kiilut angullugit imaqarsinnaasunut ikiorarneqartarput. Karsit ulikkaaraangata nunakkut 50 kilometerit missaat atorlugit Royal Greenlandip suliffissuanut assartorneqartarput.

Ilulissani aalisartut 15-iniit 20-nut amerlassusillit, ukiukkut sikumi aalisartut, Royal Greenlandip Ilulissani suliffissuanut tunisisarput.

Aalisartut pisaasa snescooterimik assartorneqarsinnaanerannik Namminersorlutik Oqartussat Qaasuitsup Kommunianut akuersissuteqarsimapput.

Aqqut aalajangersimasoq

Ilulissat Kangerluanni aalisartut pisaassa snescooterimik assartorneqarsinnaanerat pilersinneqarpoq Ilulissani aalisartut, Ilulissat Fiskeriservice I/S-ip Royal Greenlandillu suleqatigiinnerisigut.

Akuersissummi piumasaqaataavoq snescooterit aqqutikkut aalajangersimasukkut taamaallaat ingerlasinnaasut - nunakkuinnarlu kangerlukkuunngitsoq, taanna FN-ip ataani UNESCO-mit nunarsuarmi kingornussassatut toqqarneqarsimammat.