takornariaqarneq
Piorsaanermut Aningaasaateqarfik sisorartarfissamut tapersersuivoq
Sisimiut eqqaani Aqqutikitsup Sermiani ukioq naallugu sisorartarfissaq. Aamma siunissaq ungasinnerusoq eqqarsatigalugu uumasuusivik. Sisimiuni aallarnissaasut annertuunik eqqarsaateqarput. Kisianni Piorsaanermut Aningaasaateqarfimmit isumassarsiat taperserneqarput
Aallarnissaasut Laarseeraq Skifte aamma Klavs S. Møller Sisimiut eqqaani Aqqutitsikitsup Sermiani ukioq naallugu nunanit tamalaaneersunit orninneqarsinnaasumik sisorartarfissamik pilersitsinissaminnik takorluugartik qanilliallappaat. Qanittukkut taakku marluullutik ingerlatseqatigiiffik Sikumiut Greenland Aps., Jørgen Wæver Johansen aamma Greenland Invest ApS peqatigalugit pilersippaat. Aamma kingullertigut ingerlatseqatigiiffmmiut aningaasat pillugit Piorsaanermut Aningaasaateqarfimmeersut ataatsimeeqatigaat.
Kalaallit danskillu ingerlatseqatigiiffiutaat
Kalaallit danskillu ingerlatseqatigiiffiutaat sisorartarfissaannaanngitsumik pilersitsinissamik pilersaaruteqartoq pineqarpoq, aammali sulinngiffeqarnermi ornittagassamik pilersitsinissaq pineqarpoq. Tamakku saniatigut ingerlatseqatigiiffimmi Sisimiut Kangerlussuullu akornanni aqquserngup piviusunngortinneqarnissaa qulakkeerinneqataaffiginiarneqarpoq. Kiisalu siunissaq ungasinnerusoq eqqarsaatigalugu sulinngiffeqarnermi ornitaassani uumasuusivimmik pilersitsisoqarnissaa takorluugaavoq.
– Ukiuni 30-ni Sisimiut eqqaani sisorartarfissaq sulissutigisimavarput. Aamma Aqqutikitsup Sermia sisorartarfissap sanaffigineqarnissaanut eqqortuuvoq, tassami ammalortunngorlugu 8 kilometerit iluanni takornarianut assigiinngitsorpassuarnik sammisassanik ineriartortitsisinnaavugut, Klavs S. Møller oqarpoq.
Suliniummi anguniaqarluarfiusumi Sikumiut Greenland sisorartarfissamut akuersissummik tunineqassanersoq aamma sumiiffiup Sisimiuniit Kangerlussuarmut aqqusinermut atassuseqarnissaa apeqqutaaginnalerpoq, taamaalillutik takornariat Kangerlussuarmiit toqqaannartumik sisorartarfissamukaanneqarsinnaalerlutik.
Piorsaanissamut Aningaasaateqarfimmiut akuersaarput
Suliniut pillugu allaaserisami sisorartarfiliornissaq 135 millioner koruuninik akeqassaaq, taannalu nunani tamalaani aningaasaliisartut aqqutigalugit aningaasaliiffigineqassaaq, Greenland Venture, piorsaanermut taarsigassarsiat, taarsigassarsiniartitsisarfinnit taarsigassarsiat. Tamanna ilutigalugu suliniut Sisimiuni ulloq naallugu suliffinnik 28-nik pilersitsisinnaassaaq. Piorsaanermut aningaasaateqafimmi namminersorluni inuussutissarsiutilinnut pisiniartartunut pisortap suliniut pitsaasutut isigaa, naak suli pilersaarusiorfimmiikkaluartoq.
Suliniut pillugu allaaserisaq Sermitsiaq avisiimi tamakkerlugu atuaruk, aviisi digitaliusoq uani pisiarisinnaavat: