Ilinniarneq

Pinngortitaleriffimmi ilinniarnini naammassigaa

Biologimik ilinniartoq nunatsinneersoq siullermeerluni najukkamini biologimi ilinniarnertuunngorpoq, maannalu biologimi cand. scient.-itut imminut taasinnaanngorpoq. Tamatuma saniatigut 50.000 koruuninik pisuunnguallappoq

Mala Broberg
Mala Broberg biologinngortoq

Mala Broberg ullumikkut sisamanngornermi oqaluttuarisaanermut ilannguppoq, Pinngortitaleriffimmi soraarummeerutini censorimut Morten Meldgaardimut kiisalu immikkut ilinniartitsisui marluk, seniorforsker Rasmus Hedeholm Pinngortitaleriffimmeersoq aamma Associeret professor Peter Grønkjær Aarhus Universitetimeersoq soraarummeersitsisuusoq najullutik.

Angusaminullu atatillugu aamma ''Juuntaap nersorinnissutaa 2016'' pissarsiaraa, (siornatigut siusinnerusukkut Jonathan Motzfeldtsip kajumissaataa) 50.000 koruuninik nalilik.

Mala Brobergip nunatsinniit illersuisinnaanera Aarhus Universitetip Pinngortitaleriffiullu Arktisk semesterimik taaguuserlugu kanditatinngorniarlutik ilinniartut pikkorissartinneqartarnissaat pillugu suleqatigiinnissamik isumaqatigiissuteqarnikuummata pisinnaavoq, Pinngortitaleriffik nittartakkamini ilisimatitsivoq.

Pisortaq nuannaartoq
- Pinngortitaq pillugu ilisimatuussutsikkut tunngaveqartumik ilinniartitsinerup maani ingerlanneqarsinnaalernerisa kingunerisaanik aamma kalaallimik kandidatinngortoqareernera nuannersorujussuuvoq. Soraarummeersitsinerup siulliup maani Kalaallit Nunaanni ingerlanneqarsinnaasimammat Aarhus Universiteti qutsavigerujussuarparput. Tamanna Mala Broberg-imut aammalumi ilaqutaanut ikinngutaanullu kisimi nuannaarutaanani aammali Kalaallit Nunaannut isumalerujussuuvoq, Pinngortitaleriffiup pisortaa Klaus Nygaard oqarpoq.

Mala Brobergip immikkut sammisaani pineqarput Kalaallit Nunaata kitaani Kapisillit kuuani kapisillit kinguaassisinnaaleqqajaalersut amerlassusiat aammalu atugassarititaannut tunngassuteqartut.

50.000 koruunit akissarsiarai
”Juuntaap nersorinnissutaa” inunnut ataasiakkaanut arlalinnulluunniit – pingaartumik inuusunnerusunut, suliaqarnermikkut immikkut ittumik malugineqartariaqartumik angusaqarsimasunut imaluunniit immikkut ittumik piginnaaneqartunut ukiut tamaasa tunniunneqartarpoq, aningaasaateqarfimmi siulersuisut ilisimatitsipput.

Nersorinnissut, Juuntaap nammineq oqarneratut – nersorinnissutip kajumissaatitut tiguneqarnissaa Jonathan Motzfeldtip Aningaasaateqarfianik pilersitsinermi siunertaavoq.

Aningaasaateqarfimmi siulersuisut ilisimatitsipput ukioq 2016-imi nersorinnissummik tunniussinissami makkua immikkut isiginiarneqassasut: Ilinniartitaanermik, piorsaanermik, nutaaliornermik, inuussutissarsiornermik siuarsaanermik sammisaqartut kiisalu inuiaqatigiinnik siuarsaanermut pingaaruteqartut allat soorlu; suliniaqatigiiffiit arlaannaannulluunniit attuumassuteqanngitsut.

Powered by Labrador CMS